لندن: سڑک پر سگریٹ کا ٹکڑا پھینکنے کے جرم میں ایک برطانوی شہری کو 558 پاؤنڈ (تقریباً ڈیڑھ لاکھ روپے) جرمانہ ادا کرنا ہوگا۔
برطانوی میڈیا کے مطابق برطانوی شہر گلوسسٹر میں عدالت نے ایک شخص کو سگریٹ کا بٹ گرانے پر 558 پاؤنڈ جرمانہ ادا کرنے کا حکم دیا ہے۔
بی بی سی کے مطابق گلوسسٹر کے ووڈرف کلوز سے تعلق رکھنے والے الیکس ڈیوس کو کونسل کے افسران نے 17 اگست 2022 کو تھورنبری ہائی اسٹریٹ پر سگریٹ گراتے ہوئے دیکھا تھا۔
افسران نے اس کا چالان کاٹا لیکن اس نے جرمانہ ادا نہیں کیا، اور برسٹل مجسٹریٹ کی عدالت میں اپنی غیر موجودگی میں وہ کوڑا کرکٹ پھینکنے کا مجرم پایا گیا، اب اسے 220 پاؤنڈ جرمانہ، 250 پاؤنڈ لاگت اور 88 پاؤنڈ کا وکٹم سرچارج ادا کرنا ہوگا۔
واضح رہے کہ برطانیہ میں کوڑا پھینکنے کے لیے مقررہ جرمانے کی رقم 150 پاؤنڈ ہوتی ہے، اگر 10 دنوں کے اندر ادائیگی کی جائے تو اسے کم کر کے 75 پاؤنڈ کر دیا جاتا ہے۔