کراچی : جان بچانے والی ادویات کی قیمتوں میں کمی کا فیصلہ کرلیا گیا ہے، دواؤں کی قیمتوں میں 10 سے 30 فیصد تک کمی کی جائے گی۔
تفصیلات کے مطابق ڈرگ ریگولیٹری اتھارٹی نے جان بچانے والی ادویات کی قیمتوں میں کمی کا فیصلہ کیا ہے، مذکورہ دواؤں میں کینسر، ٹی بی، دماغی امراض اور بلڈپریشر سمیت 120 ادویات شامل ہیں۔
اس کے علاوہ بچوں کی بیماریوں کی دواؤں کی قیمتیں بھی کم کردی گئیں ہیں، اس حوالے سے ذرائع کا کہنا ہے کہ ملکی اور غیر ملکی کمپنیاں آئندہ تین سال میں دواؤں کی قیمت میں 30 فیصد کمی لائیں گی، قیمتوں میں کمی کا فیصلہ ڈرگ ریگولیٹری اتھارٹی کی کوششوں سے ممکن ہوا ہے۔
یاد رہے کہ اس سے قبل متعدد مرتبہ ادویات کی قیمتوں میں ہوشربا اضافہ کیا جا چکا ہے اس تمام عرصے میں ادویات بنانے والی مختلف کمپنیوں نے عوام کی جیب پر چھ سے سات ارب روپے کا ڈاکہ ڈالا، یہی نہیں ان کمپنیوں نے حکومت کی اجازت کے بغیر ازخود ادویات کی قیمتوں میں اضافہ بھی کیا۔
ماہرین صحت کے مطابق عوام کو چاہیے کہ وہ مہنگی ادویات کا ازخود بائیکاٹ کریں یا پھر ڈاکٹرز کی جانب سے تجویز کردہ بڑی کمپنیوں کی مہنگی دوائیں خریدنے کے بجائے ڈاکٹروں کو اس بات پر آمادہ کریں کہ وہ اسی فارمولے کی کوئی سستی دوا تجویز کریں۔
صحت کے شعبے میں کرپشن کے اولین ذمہ دار مبینہ طور پر ڈاکٹرز ہی ہوتے ہیں، کرپشن کا آغاز ان ہی ڈاکٹروں سے ہوتا ہے، بعض ادویہ ساز کمپنیاں مہنگی دوا کی فروخت کیلئے سب سے پہلے ڈاکٹرز کو پرکشش مراعات کے عوض خرید لیتی ہیں۔
خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
