دبئی: متحدہ عرب امارات نے دبئی ایئر شو کی تاریخوں کو اعلان کردیا ہے۔
میڈیا رپورٹ کے مطابق دبئی ایئر شو دو ہزار اکیس نائب صدر، وزیراعظم اور دبئی کے حکمران شیخ محمد بن راشد آل مکتوم اور متحدہ عرب امارات کے وزیر دفاع کی سرپرستی میں رواں سال چودہ سے اٹھارہ نومبر تک منعقد ہوگا۔
دبئی ایئر شو میں ہوا بازی، ٹیکنالوجی اور خلا سے متعلق امور پر نو مباحثوں کا اہتمام کیا جائے گا جس میں ان شعبوں سے تعلق رکھنے والی ممتاز شخصیات بھرپور بحث کریں گی، مباحثوں میں ہوائی سفر میں انقلاب لانے میں نئی ٹیکنالوجیز کا کردار، کارگو سیکٹر میں ہونے والی بڑی تبدیلیوں، پائیداری اور خود مختار نقل و حمل میں عالمی ترقی، نئی خلائی خدمات اورسیٹلائٹ رابطوں سمیت متعدد امور پر تبادلہ خیال کیا جائے گا۔
میڈیا رپورٹ کے مطابق دبئی ایئرشو میں دنیا کی ممتاز شخصیات حصہ لیں گی جن میں متحدہ عرب امارات کے سائبر سیکورٹی کے سربراہ ڈاکٹر محمد الکویتی، ایئر ایشیا میں گروپ چیف آپریشنز آفیسر جاوید ملک، ساؤتھ ویسٹ ایئر لائنز میں ماحولیاتی پائیداری اور سپلائی چین کے نائب صدر اسٹیسی مالفور، سی وی جی ائیرورٹ پر چیف انوویشن آفیسر برائن کوب، سپائسی جیٹ کے چیف ٹیکنالوجی اور انوویشن آفیسر آشیش وکرم اور بوئنگ میں پائیداری اور مستقبل کی نقل و حرکت کے چیف انجینئر برائن یوٹکو شامل ہیں۔
بوئنگ کے چیف افیسر کرس ریمنڈ نے اپنے بیان میں کہا کہ متحدہ عرب امارات پائیدار مستقبل کے لیے پرعزم ہے اور ہم نے پائیدار ہوا بازی کی ترقی کے لیے پائیدار بائیو انرجی ریسرچ کنسورشیم کی بنیاد رکھنے جیسے متعدد اقدامات پر ان کے ساتھ تعاون کیا ہے۔
انہوں نے کہا کہ ہم اتحاد ایئرویز کے ساتھ گرین لائنر پروگرام اور ایکو ڈیمونسٹرٹر دو ہزار بیس پروگرام کے ساتھ شراکت داری کے لیے شکر گزار ہیں، اس سے جدید ٹیکنالوجی کو آپنانے کا عمل تیز ہوگا اور آنے والی نسلوں کے لیے پروازوں کی حفاظت اور پائیداری بڑھانے میں مدد ملےگی۔
