دبئی: متحدہ عرب امارات کے مشہور ترین دبئی ایئرپورٹ پر مسافروں کی تعداد میں کافی حد تک کمی ریکارڈ کی گئی ہے۔
غیرملکی خبررساں ادارے کی رپورٹ کے مطابق دبئی ایئرپورٹ کا شمار دنیا کے مصروف ترین ہوائی اڈوں میں ہوتا ہے، تاہم حالیہ رپورٹ میں اس ایئرپورٹ سے مسافروں کی کم آمدورفت ریکارڈ کی گئی۔
رپورٹ میں کہا گیا ہے 2019 میں دبئی ایئرپورٹ سے 86.4 ملین افراد نے سفر کیا جو 2018 کے مقابلے میں مسافروں کی تعداد 3.1 فیصد کم ہے۔ غیرملکی میڈیا نے خدشہ ظاہر کیا ہے کہ کروناوائرس کے پیش نظر 2020 میں بھی مسافروں کی آمد ورفت اس ایئرپورٹ پر گھٹے گی۔
کرونا وائرس کے مریضوں کے لیے متحدہ عرب امارات کا بڑا اعلان
متعلہ اداروں کا کہنا ہے کہ مسافروں کی تعداد میں کمی کی کئی وجوہات ہوسکتی ہیں، ان میں ہیلی پیڈ کی عارضی بندش، انڈین جیٹ ایئر ویز کا حادثہ اور بوئنگ 737 میکس طیاروں کی پرواز پر پابندی قابل ذکر ہیں۔ خیال رہے کہ مسلسل حادثے کے باعث بوئنگ طیاروں کی پرواز پر پابندی عائد کردی گئی تھی۔
2019 میں دبئی ایئرپورٹ ممکنہ طور پر 32.2ملین مسافروں سے محروم رہا۔
خیال رہے کہ دنیا بھر میں پھیلتے وائرس کے پیش نظر کئی ممالک نے اپنے شہریوں پر سفری پابندی بھی عائد کردی ہے جس کے باعث مزید مسافروں کی آمد ورفت معطل رہے گی، جس سے ایئرپورٹ انتظامیہ کو شدید خسارے کا بھی سامنا کرنا پڑسکتا ہے۔
