دبئی: ایک ریسٹورنٹ کے مالک نے ایسے لوگوں کو مفت کافی پلانے کی انوکھی پیشکش کی ہے جنہوں نے کورونا ویکسین لگوالی ہے۔
تفصیلات کے مطابق متحدہ عرب امارات کے ایک سرمایہ کارعلی خان نے جو کیفے ریسٹریٹو چین کے مالک ہیں کورونا ویکسین لینے والوں کو مفت کافی کی پیشکش کی ہے۔
غیر ملکی خبر برساں ادارے کے مطابق علی خان کا کہنا ہے کہ یہ پیشکش ایک ماہ کے لیے ہے اور اس کا مقصد معاشرے میں کورونا ویکسین کی اہمیت اجاگر کرنا ہے۔ سوشل میڈیا پر صارفین نے علی خان کی اس پیشکش پر غیرمعمولی پسندیدگی کا اظہار کیا ہے۔
علی خان نے میڈیا سے گفتگو کرتے ہوئے کہا کہ ہماری پیشکش ہے کہ اگر آپ نے کورونا ویکسین لے لی تو ہمارے یہاں سے مفت کافی نوش کریں اب تک روزانہ 80 افراد اس پیشکش سے لطف اٹھاچکے ہیں۔
اس سے قبل بھی علی خان لاک ڈاؤن کے موقع پر دبئی کے راشد اسپتال میں اسپیشل کافی ہاؤس قائم کرچکے ہیں جہاں چار ماہ تک پولیس اہلکاروں، شہری دفاع کے اہلکاروں، ڈاکٹروں اور نرسوں کو مفت کافی پیش کی جاتی رہی ہے۔ علی خان اپنے کافی ہاؤس کی شاخیں بھارت اور مصر میں بھی قائم کرنے کا ارادہ رکھتے ہیں۔
ذرائع کے مطابق اس کے علاوہ دبئی کے کئی اور ریستوران بھی کورونا ویکسین لگوانے والے صارفین کے لیے رعایتی پیشکشیں کررہے ہیں۔
کورونا ویکسین کی پہلی خوراک لینے والوں کو ڈنر کے لیے دس اور دوسری خوراک لینے والوں کو بیس فیصد رعایت کی پیشکش کی جارہی ہے۔
اس پشکش سے فائدہ اٹھانے کے لیے کورونا ویکسین لگوانے کا ثبوت جیسے میڈ یکل سرٹیفکیٹ دکھانا ضروری ہے۔
