یو اے ای : دبئی حکومت کی جانب سے مختلف ممالک کے ایک ہزار فن کاروں اور تخلیق کاروں کو ان کی تخلیقی صلاحیتیں اجاگر کرنے لیے خصوصی ویزا جاری کیا جائے گا۔
اس حوالے سے دبئی محکمہ ثقافت نے کہا ہے کہ آئندہ مرحلے میں مختلف ممالک کے ایک ہزار فن کاروں اور تخلیق کاروں کو ثقافتی ویزے جاری کرنے کا فیصلہ کیا گیا ہے، یہ طویل المعیاد اور دنیا بھر میں اپنی نوعیت کا پہلا اقدام ہوگا۔
غیر ملکی ذرائع ابلاغ کے مطابق نائب صدر و وزیراعظم شیخ محمد بن راشد آل مکتوم نے 2019 میں اس کی منظوری دی تھی۔ اس کا دورانیہ 10 سال کا ہوگا اور یہ قابل توسیع ہوگا۔
اس کی بدولت دبئی ثقافت اور تخلیق کا عالمی مرکز بن جائے گا۔ دبئی دنیا کے مختلف ملکوں کے فن کاروں، اسکالرز، دانشوروں اور ادیبوں کو اپنی تخلیقی صلاحیتیں اجاگر کرنے کا پلیٹ فارم بن جائے گا۔
دبئی محکمہ ثقافت نے بیان میں بتایا کہ اب تک 46 ممالک کے 261 تخلیق کاروں اور دانشوروں نے ثقافتی ویزےکی درخواستیں پیش کی ہیں۔ ان میں سے 120 مقررہ شرائط پر پوری اتری ہیں۔ ان کے لیے ویزا کارروائی آخری مرحلے میں ہے۔
دبئی محکمہ ثقافت کی ڈائریکٹر جنرل ھالہ بدری نے کہا کہ دبئی تخلیق اور تخلیق کاروں کا وطن ہے۔ ثقافتی ویزا دینے کا فیصلہ دنیا بھر میں دبئی کو ثقافتی مرکز کی حیثیت سے نمایاں کرنے کے لیے کیا گیا ہے۔ اس کی بدولت متحدہ عرب امارات بین الاقوامی ثقافتی منظر نامے میں سرفہرست آجائے گا۔
اس سے ثقافتی معیشت کو بھی فروغ ملے گا۔ تخلیقی صنعتیں فروغ پائیں گی- تخلیق کاروں کو ریاست کے ترقیاتی عمل میں شامل کرنے کے مواقع ملیں گے۔
ھالہ بدری نے کہا کہ طویل المیعاد ثقافتی ویزے کی بدولت تخلیق کاروں کو ذہنی اطمینان نصیب ہوگا۔ یہی پہلو انہیں اول درجے کی تخلیقات پر آمادہ کرے گا۔
