دبئی: متحدہ عرب امارات کی ریاست دبئی میں گزشتہ دنوں ایک صفائی کرنے والے ملازم کی تصویر خوب وائرل ہوئی جس نے سڑک کنارے فٹ پاتھ پر درخت سے گرنے والی پتیوں سے دل بنا ڈالا تھا۔
گلف نیوز کی رپورٹ کے مطابق دبئی میں کلینر کے اس اقدام نے لوگوں کے دل موہ لیے اور ہر کوئی جاننا چاہتا تھا کہ آخر اس وقتق اس ورکرز کے جذبات کیا تھے جس کے پیش نظر اس نے سڑک کنارے دل بنایا۔
اماراتی ویب سائٹ نے اس نوجوان کو ڈھونڈ لیا اور اس سے وجہ بھی دریافت کرلی، نوجوان رامیش گنگارام گیندی بھارتی ریاست تلنگانہ کا رہائشی ہے اور دس برس سے روزگار کے سلسلے میں دبئی میں مقیم ہے۔
دبئی آنے سے ایک ماہ قبل اس کی شادی ہوئی تھی اس نے بتایا کہ اس روز مجھے میری بیوی کی بہت یاد آرہی تھی، کام ختم کیا تو میرا واپس جانے کو دل نہیں کررہا تھا چنانچہ وہاں فٹ پاتھ پر گری پتیوں سے دل بنانا شروع کردیا۔
رامیش کے مطابق ‘شادی کے ایک ماہ بعد ہی میں دبئی آیا کاش میں مزید وقت اپنی بیوی کے ساتھ گزار سکتا۔
وائرل تصویر قریبی گھر کی رہائشی خاتون نسیمہ فرحت نے بنا کر سوشل میڈیا پر پوسٹ کی تھی، جس میں انہوں نے لکھا تتھا کہ ’اس ملازم کو سڑک پر دل بناتے دیکھ کر میرا دل بھر آیا مگر میں یہ سوچ کر دکھی ہوگئی کہ آخر اس وقت اس کے دل میں کیا چل رہا ہوگا کہ اس نے سڑک پر دل ہی بنادیا۔‘‘
