دبئی: دبئی کے حکمران کی جانب سے ہزاروں افراد کے لیے بڑا رہائشی پیکج جاری کیا گیا ہے جو شہریوں کے لیے ولاز اور پلاٹوں پر مشتمل ہے۔
تفصیلات کے مطابق امارات کے نائب صدر اور دبئی کے حکمراں شیخ محمد بن راشد آل مکتوم نے دبئی کے شہریوں کے لیے 6.3 ارب درہم کی لاگت کا ایک رہائشی پیکج جاری کیا ہے۔
الامارات الیوم کے مطابق رہائشی پیکج کے تحت 4 ہزار 610 شہریوں کو مکانات اور پلاٹس دیے جائیں گے، حکومت اس منصوبے پر6.3 ارب درہم کی سرمایہ کاری کرے گی۔
یہ پیکج شیخ محمد بن راشد آل مکتوم کی اس خواہش پر مبنی ہے جس میں وہ چاہتے ہیں کہ دبئی کے شہری باوقار زندگی گزاریں اور خاندانی طور پر مستحکم ہوں، ان کا رہن سہن امارات کے آسائشی نظام سے ہم آہنگ ہو۔
دبئی کے حکمران نے اس رہائشی پیکج کا اعلان عید الفطر کی آمد پر کیا ہے، انھوں نے کہا کہ سماجی خدمات اور رہائشی اسکیمیں حکومت کی ترجیح ہیں، خواہش ہے کہ امارات کے ہر شہری اور خاندان کی تمام ضرورتیں پوری ہوں۔
واضح رہے کہ دبئی کے شمال مشرق میں مضافاتی علاقے الخویخ میں ایک ہزار 100 ولاز کے نئے ہاؤسنگ کمپلیکس کی منظوری دی جا چکی ہے، امارات کے شہری اس کے لیے گرانٹ اور قرضے حاصل کر سکیں گے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں