The news is by your side.

Advertisement

دبئی: سیاحوں کے لیے بڑی خوش خبری

دبئی: رواں ماہ دبئی شہر میں دنیا کے سب سے بڑے فوارے کا افتتاح ہونے جا رہا ہے۔

تفصیلات کے مطابق دبئی میں دنیا کا سب سے بڑا فوارہ تکمیل کے آخری مرحلے میں ہے، جمعرات 22 اکتوبر کو اس کا افتتاح کیا جائے گا۔

فوارے کو النخلہ (پام فاؤنٹین) کا نام دیا گیا ہے، اس بات کا بھی امکان ہے کہ اسے گنیز بک آف ورلڈ ریکارڈ میں شامل کیا جائے، فوارے کی افتتاح کے بعد دنیا بھر کے سیاحوں کے لیے ایک اور تفریحی مقام میسر آ جائے گا۔

یہ فوارہ 105 میٹر بلند ہے، اور یہ 14 ہزار اسکوائر فٹ کے دائرے میں پھیلا ہوا ہے، اس کے نچلے حصے میں 3 ہزار سے زیادہ بلب لگائے گئے ہیں جن کی رنگا رنگ روشنی سے پانی کے ساتھ ایک دل فریب منظر دیکھنے کو ملے گا۔

رپورٹس کے مطابق النخلہ فوارے کے افتتاح کے موقع پر انتظامیہ نے مختلف قسم کے پروگرامز بھی ترتیب دیے ہیں جن میں آتش بازی، مختلف قسم کے مقابلے اور ڈانس شوز بھی ہوں گے۔

دبئی میں دنیا کا منفرد ترین میوزیم تکمیل کے قریب

اس تفریحی مقام پر کچھ پروگرامز مستقل بنیادوں پر بھی ہوں گے جیسا کہ انتظامیہ روزانہ بیس شو پیش کرے گی، اس کی شروعات مغرب کے بعد سے ہوگی جس کا سلسلہ آدھی رات تک جاری رہے گا، جب کہ ہر شو کا دورانیہ 3 منٹ ہوگا اور ایک شو سے دوسرے شو کے درمیان آدھے گھنٹے کا وقفہ ہوگا-

واضح رہے کہ دنیا کا سب سے بڑا مانا جانے والا فوارہ بھی اس وقت دبئی ہی میں ہے، یہ فوارہ دبئی مال کا ہے جسے دبئی فاؤنٹین کہا جاتا ہے، نئے فوارے کے افتتاح کے بعد یہ اعزاز پام فاؤنٹین کو منتقل ہو جائے گا۔

فوارے کے سلسلے میں گنیز بک آف ورلڈ ریکارڈ کا عملہ بھی متحرک ہے، مشرق وسطیٰ کے لیے گنیز کے انچارج شادی جاد نے پام فاؤنٹین پر تبصرہ کرتے ہوئے کہا کہ اس سے دبئی کے پرکشش اور قابل دید مقامات میں ایک اور شان دار اضافہ ہو جائے گا۔

Comments

یہ بھی پڑھیں