سعودی عرب میں دومتہ الجندل نامی علاقہ مختلف تاریخی و سیاحتی مقامات سے مالا مال ہے اور ان میں سے ہر ایک اپنی الگ شناخت رکھتا ہے۔
سعودی ویب سائٹ کے مطابق سعودی عرب کے الجوف ریجن کی کمشنری دومتہ الجندل پرکشش ماحول، شاندار تاریخ اور منفرد خصوصیات کے باعث سیاحوں کا مرکز بنا ہوا ہے۔
یہ علاقہ مختلف سیاحتی مقامات سے مالا مال ہے اور ان میں سے ہر ایک اپنی الگ شناخت رکھتا ہے۔
یہاں کے ساحلی اور تاریخی مقامات سیاحوں کے لیے بڑی کشش رکھتے ہیں، الجوف میں کھجوروں کا فیسٹول بھی دنیا بھر میں مشہور ہے۔
اس کمشنری کا ایک امتیاز دومتہ الجندل جھیل ہے، یہ مملکت کی بڑی جھیلوں میں سے ایک ہے۔ اس کے ساحل سبزہ زاروں سے ڈھکے ہوئے ہیں، سحر آفریں ساحلی مقامات کی سیر اور سمندری اسپورٹس کا اپنا مزہ ہے۔
تاریخی حوالوں سے بھی دومتہ الجندل اپنی ایک خاص پہچان رکھتا ہے۔ یہاں عظیم مارد قلعہ، مسجد عمر بن خطاب، الدرع تاریخی محلہ، دومتہ الجندل فصیل قابل دید ہیں۔
الجوف عجائب گھر میں پورے خطے کی تاریخ ایک چھت تلے دیکھنے کا موقع ملتا ہے۔ عجائب گھر دیکھنے والے یہ جان کر خوشی محسوس کرتے ہیں کہ الشویحطیہ میں دنیا کی قدیم ترین بستی آباد تھی۔
اسلامی دور تک کی تاریخ اسی عجائب گھر میں دیکھنے کو ملتی ہے، عمر بن خطاب مسجد کا مینارہ بھی عجائب گھر میں سجا ہوا ہے جسے اسلامی تاریخ کے قدیم ترین مینارہ ہونے کا اعزاز حاصل ہے۔
