The news is by your side.

Advertisement

کراچی میں مون سون بارش کے چھٹے اسپیل کا دورانیہ بڑھ گیا

کراچی: شہر قائد میں مون سون بارش کے چھٹے اسپیل کا دورانیہ بڑھ گیا، محکمہ موسمیات کا کہنا ہے کہ پیر سے جمعرات تک تیز ہواؤں کے ساتھ بارش کا امکان ہے۔

اے آر وائی نیوز کے مطابق ڈائریکٹر محکمہ موسمیات نے کہا ہے کہ کراچی میں بارش کا چھٹا اسپیل طویل ہو گیا ہے، سندھ اور راجستھان میں بارشوں کے نظام اور بحیرہ عرب میں نمی کی وجہ سے طوفانی بارشوں کا امکان ہے۔

موسمیات کی پیش گوئی کے مطابق کراچی میں 25 اگست کو گرج چمک کے ساتھ طوفانی بارش ہو سکتی ہے، اور شہر سمیت سندھ میں اربن فلڈنگ کا خدشہ ہے، ڈائریکٹر موسمیات کا کہنا ہے کہ کراچی سمیت سندھ میں 150 ملی میٹر سے زائد بارش کا امکان ہے۔

واضح رہے کہ محکمہ موسمیات نے کراچی میں آج تیسرے روز بھی بارش کی پیش گوئی کی تھی، کہا گیا تھا کہ وقفے وقفے سے ہونے والی بارش کا سلسلہ بدھ تک جاری رہے گا، تاہم بارش نہیں ہو سکی ہے۔

محکمہ موسمیات نے کراچی میں آج بھی بارش کی پیش گوئی کر دی

محکمے کے مطابق کراچی میں سمندری ہوائیں بحال نہیں ہو سکی ہیں، ہوا میں نمی کا تناسب 77 فی صد رہا۔

خیال رہے کہ گزشتہ روز ہونے والی بارش کے بعد بھی کراچی میں ندی نالے ابل پڑے تھے، سرجانی ٹاؤن، یوسف گوٹھ، بلدیہ ٹاؤن سمیت مضافاتی علاقوں میں بارش اور سیوریج کا پانی گھروں میں داخل ہو گیا تھا۔

نارتھ کراچی ناگن فلائی اوور سے پاور ہاؤس چورنگی جانے والی سڑکوں پر بارش کا پانی تا حال جمع ہے، برساتی پانی کے باعث سڑک ٹریفک کے لیے بند ہے، بارش کے پانی کے سبب متعدد گاڑیاں خراب ہو کر بند ہو گئیں۔

گزشتہ روز صوبے بھر میں موسلادھار بارشوں کے نتیجے میں کئی علاقے زیر آب آئے تھے اور شہر قائد میں مختلف حادثات میں 7 افراد جاں بحق ہو گئے تھے۔

Comments

یہ بھی پڑھیں