نئی دہلی : بھارتی حکومت نے کوکنگ آئل کے بحران پر قابو پانے کیلئے سورج مکھی کے تیل کی ڈیوٹی فری درآمد کی اجازت دے دی۔
بھارت میں کوکنگ آئل خوراک کا بنیادی حصہ ہے، بھارت دنیا میں دوسرے نمبر پر سب سے زیادہ کوکنگ آئل اور پہلے نمبر پر سب سے زیادہ ویجیٹیبل آئل درآمد کرتا ہے۔
اس کی ضرورت کا تقریباً 56 فیصد کوکنگ آئل سات سے زیادہ ملکوں سے درآمد کیا جاتا ہے، بھارت میں کھانا بنانے کیلئے اکثر پام، سویا بین یا سن فلاور آئل استعمال کیا جاتا ہے۔
ذرائع کے مطابق بھارتی حکومت نے گزشتہ روز ملک میں اشیائے ضروریہ کی قیمتوں میں استحکام کے لیے ہر سال20 لاکھ میٹرک ٹن خام سویا بین تیل اور خام سورج مکھی کے تیل کی درآمد پر کسٹم ڈیوٹی پر رعایت دی ہے۔
وزارت خزانہ کے ایک نوٹیفکیشن کے مطابق 20 لاکھ ایم ٹی فی سال کی ڈیوٹی فری درآمد دو مالی سال 23 2022اور24-2023 کے لیے خام سویا بین تیل اور خام سورج مکھی کے تیل کے لیے لاگو ہوگی۔
اس کا مطلب یہ ہوگا کہ31 مارچ 2024 تک خام سویا بین تیل اور سورج مکھی کے خام تیل پر کل 80 لاکھ ایم ٹی ڈیوٹی فری درآمد کیا جاسکتا ہے۔ اس اقدام سے مقامی قیمتوں کو کم کرنے اور مہنگائی کو کنٹرول کرنے میں مدد ملے گی۔
اس حوالے سے آیک آئل ڈیلر کا کہنا ہے کہ آنے والے مہینوں میں ہندوستان کی سویا بین آئل کی درآمدات میں نمایاں اضافہ ہوگا لیکن روس اور ارجنٹائن کے پاس محدود اسٹاک ہونے کی وجہ سے سن فلاورآئل کی درآمدات میں اضافے کا امکان نہیں ہے۔
