The news is by your side.

Advertisement

جدید اورمحفوظ ترین ای پاسپورٹس کے اجراء کی تیاریاں مکمل

کراچی : جعلسازی سے مکمل محفوظ ای پاسپورٹس کے اجراء کی تیاریاں مکمل کرلی گئیں، پہلے مرحلے میں سرکاری افسران اور سفارت کاروں کو جاری کئے جائیں گے۔

تفصیلات کے مطابق حکومت نے مائیکرو چپ والے جدید ای پاسپورٹس کے اجراء کیلئے اقدامات کرلیے، اس سلسلے میں ابتدائی طور پر سفارت کاروں اور سرکاری افسران کو ای پاسپورٹس جاری کیے جائیں گے، مذکورہ پاسپورٹس کو جعلسازی سے مکمل محفوظ رکھنے کیلئے مائیکرو چپ لگائی گئی ہے۔

ذرائع کے مطابق بلیو اورریڈ پاسپورٹس کے اجراء کا آغاز مارچ 2018 سے ہو گا جبکہ عام شہریوں کو ای پاسپورٹس کا اجراء دوسرے مرحلے میں کیا جائے گا۔

سیکورٹی پرنٹنگ پریس سے بائیو میٹرک پاسپورٹس کی پہلی کھیپ اسلام آباد روانہ کردی گئی ہے، پہلے مرحلے میں پانچ سو آزمائشی ای پاسپورٹس جاری کئے جائیں گے۔

ذرائع کا مزید کہنا ہے کہ ای پاسپورٹس میں نئے محفوظ ترین سیکورٹی فیچرز شامل کیے گئے ہیں، سیکیورٹی فیچرز میں کاربوریٹڈ صفحات، ایک عام فوٹو اور ایک ڈاٹیڈ فوٹو بھی شامل ہے۔

کاربوریٹڈ صفحات سے پاسپورٹس میں کسی بھی قسم کی جعلسازی ناممکن ہو گی، بائیو میٹرک پاسپورٹ پر لگی مائیکرو چپ میں پاسپورٹ ہولڈر کے تمام کوائف درج ہوں گے۔

دس سالہ ای پاسپورٹ کی فیس جاری کردہ عام پاسپورٹ کے برابر ہوگی، مخصوص مدت کے بعد موجودہ کمپیوٹرائزڈ پاسپورٹس مکمل طور پر ختم ہو جائیں گے۔

واضح رہے کہ کزشتہ ماہ کے وسط میں وفاقی وزیر داخلہ احسن اقبال نے عوام کو خوشخبری دی تھی کہ شہریوں کو نئے سال 2018 کے وسط میں ای پاسپورٹ کا اجراء شرو ع کردیا جائے گا جس میں مائیکرو چپ لگی ہو گی، اس جدید پاسپورٹ کے اجراء سے جعلی کاغذات کے ذریعے بیرون ملک سفر کرنے والوں کا قلع قمع کیا جا سکے گا۔

Print Friendly, PDF & Email

Comments

comments

یہ بھی پڑھیں