کویت سٹی: کویت کے مختلف علاقوں میں گزشہ شام زلزلے کے جھٹکے محسوس کیے گئے، کویتی رصد گاہ کے مطابق ریکٹر اسکیل پر زلزلے کی شدت 4.1 ریکارڈ کی گئی۔
کویتی میڈیا کے مطابق کویت کے مختلف علاقوں میں گزشہ شام زلزلہ محسوس کیا گیا، کویت انسٹی ٹیوٹ برائے سائنسی تحقیق کے مطابق ام القدیر کے علاقے میں ریکٹر اسکیل پر زلزلے کی شدت 4.1 ریکارڈ کی گئی تھی۔
کویتی قومی رصد گاہ کا کہنا ہے کہ زلزلے کا مرکز 11 کلو میٹرکی گہرائی میں ام القدیر کے علاقے میں تھا۔ یہ علاقہ کویت کے جنوب مشرق میں واقع ہے۔
زلزلے کے جھٹکے احمدی، رومیثیہ، محبولہ اور سالمیہ کے علاقوں کے علاوہ کویت کے متعدد علاقوں میں محسوس کیے گئے۔ زلزلے کے بعد لوگ خوفزدہ ہو کر عمارتوں سے باہر نکل آئے۔
مقامی میڈیا کے مطابق زلزلے کے جھٹکے مقامی وقت کے مطابق شام پانچ بج کر 58 منٹ پر محسوس کیے گئے تھے، زلزلے سے کوئی جانی و مالی نقصان نہیں ہوا۔
