کراچی: وزیراعظم عمران خان کی جانب سے گزشتہ روز کرونا وائرس کے نتیجے میں متاثر ہونے والے غریب طبقے کے لیے احساس پروگرام کے تحت فی خاندان 12 ہزار روپے دینے کا اعلان کیا گیا۔
تفصیلات کے مطابق وزیراعظم عمران خان نے گزشتہ روز احساس پروگرام کے تحت غریب طبقے کو 12 ہزار روپے دینے کا اعلان کیا جس کی تقسیم کا آغاز آج سے شروع ہوگیا، بہت سے لوگ ایسے ہیں جنہیں اس پروگرام کے تحت رقم حاصل کرنے کا طریقہ معلوم نہیں ہے۔
احساس پروگرام کی چیئرپرسن ثانیہ نشتر کا کہنا ہے کہ احساس پروگرام کے لیے 4 کروڑ 30 لاکھ 44 ہزار 60 ایس ایم ایس موصول ہوچکے ہیں۔
واضح رہے کہ اگر آپ کسی مستحق کو جانتے ہیں یا خود کو مستحق سمجھتے ہیں تو اپنے شناختی کارڈ نمبر 8171 پر ایس ایم ایس کریں اور جانیں کہ آپ اس امداد کے اہل ہیں یا نہیں۔
مزید پڑھیں: ‘احساس پروگرام میں پیغام بھیجنے پرموبائل بیلنس سے کٹوتی نہ کی جائے’ حکومت سے اپیل
ایس ایم ایس کرنے کے بعد جوابی میسج میں آپ کو بتایا جائے گا کہ آپ امداد کے اہل ہیں یا نہیں، اور اگر آپ رقم حاصل کرنے کے اہل ہوں گے تو اپنے علاقے کے کس مرکز پر جاکر نقد رقم حاصل کرسکتے ہیں یہ بھی ایس ایم ایس میں بتادیا جائے گا۔
یاد رہے کہ ثانیہ نشتر کا کہنا تھا کہ لوگ اپنے کوائف نادرا میں صحیح جمع کرائیں تاکہ ان کا تازہ ترین ریکارڈ حکومت کے پاس دستیاب ہو اور زیادہ سے زیادہ لوگ اس پروگرام سے استفادہ کرسکیں۔
خیال رہے کہ گزشتہ روز وزیراعظم عمران خان کا کہنا تھا کہ احساس پروگرام کے تحت مستحق ایک کروڑ 20 لاکھ خاندانوں کو پیسے فراہم کیے جائیں گے، 17 ہزار مقامات سے 12 ہزار روپے مستحق افراد میں تقسیم ہوں گے۔
