اسلام آباد: مشیر خزانہ عبدالحفیظ شیخ کی زیر صدارت اقتصادی رابطہ کمیٹی کا اجلاس جاری ہے، اجلاس میں مختلف مالیاتی امور پر غور کیا جارہا ہے۔
تفصیلات کے مطابق مشیر خزانہ عبدالحفیظ شیخ کی زیر صدارت اقتصادی رابطہ کمیٹی کا اجلاس کابینہ ڈویژن میں جاری ہے، اجلاس میں 2 نکاتی ایجنڈا زیر غور ہے۔
ایجنڈے میں پیٹرولیم مصنوعات کی اندرون ملک ریلوے کے ذریعے فراہمی پر غور کیا جارہا ہے جبکہ جلاس میں ملک میں گندم کی طلب و رسد کا بھی جائزہ لیا جائے گا۔
اس سے قبل 26 جون کو ہونے والے اقتصادی رابطہ کمیٹی کے اجلاس میں گھریلوصارفین کے لیے گیس کی قیمتوں میں اضافے کی منظوری دی گئی تھی۔
منظوری کے بعد گھریلو صارفین کے لیے گیس 190 فیصد تک مہنگی ہوگئی جبکہ دیگر کیٹیگریز کے لیے بھی گیس قیمتوں میں 31 فیصد سے زائد اضافے کی منظوری دی گئی تھی۔
گزشتہ اجلاس میں سعودی عرب سے ادھار تیل کے طریقہ کار کی بھی منظوری دی گئی تھی جس پر پیپرا رولز کا اطلاق نہیں ہوگا۔ علاوہ ازیں اجلاس میں پاکستان جیمز جیولری کمپنی کو ضمنی گرانٹس فراہم کرنے کی سمری بھی منظور کی گئی تھی۔
