کراچی : ملک کے سرمایہ کاروں اور تاجر برادری کی نمائندہ تنظیم آل پاکستان بزنس فورم کے عہدیداران نے مطالبہ کیا ہے کہ ملک میں معاشی ایمرجنسی نافذ کی جائے۔
تفصیلات کے مطابق پاکستان بزنس فورم کا مؤقف ہے کہ گزشتہ 10ماہ میں روپے کی قدر میں 89 روپے کی غیرمعمولی کمی واقع ہوئی ہے۔
عہدیداران کا کہنا ہے کہ ڈالر کی فری فلوٹ پالیسی معیشت کو دیمک کی طرح کھا رہی ہے، عام انتخابات کے بعد ہم پھر آئی یم ایف کے در پر ہوں گے۔
انہوں نے کہا کہ پاکستان کی تاجر برادری اپنے مطالبات کے حق کیلئے سڑکوں پر ہے اور غیرملکی سرمایہ کار کسی قیمت پر یہاں آنے کو تیار نہیں۔
آل پاکستان بزنس فورم نے اے پی سی میں معیشت کے ایجنڈے کو بھی شامل کرنے کا مطالبہ کرتے ہوئے کہا کہ سرکاری اداروں میں کفایت شعاری اپنانے کے سخت اقدامات کئے جائیں۔
پاکستان بزنس فورم عہدیداران کا مزید کہنا ہے کہ ملک کی تمام سیاسی جماعتوں نے سنجیدگی نہ دکھائی تو کچھ ماہ میں ملک ڈیفالٹ ہوجائے گا۔
مزید پڑھیں : ملک میں معاشی ایمرجنسی لگانےکا کوئی پروگرام نہیں
واضح رہے کہ روپے کی بے قدری سے ملک کا تجارتی خسارہ مسلسل بڑھ رہا ہے، سرمایہ کار اس وقت خوف میں مبتلا ہیں، سیاسی عدم استحکام نے بیرونی سرمایہ کاری کو نقصان پہنچایا ہے۔
ملک کو معاشی چیلنجز کا سامنا ہے ،زرعی ملک ہونے کے باوجود بہتر مینجمنٹ کا فقدان ہے، ملک میں بد امنی کی فضاء پھیلائی جارہی ہے۔
