The news is by your side.

Advertisement

سمندر پار پاکستانیوں کے لئے انٹرنیٹ ووٹنگ کا معاملہ، ٹاسک فورس تشکیل

اسلام آباد : سمندر پار پاکستانیوں کے لئے ای ووٹنگ کے معاملے پر الیکشن کمیشن نے انٹرنیٹ ووٹنگ ٹاسک فورس تشکیل دے دی، پہلا اجلاس کل ہوگا۔

تفصیلات کے مطابق الیکشن کمیشن نے سمندرپار پاکستانیوں کے لیے انٹرنیٹ ووٹنگ ٹاسک فورس کی منظوری دے دی ہے، اعلامیے کے مطابق ‏ٹاسک فورس سپریم کورٹ کے حکم کی روشنی میں تشکیل دی گئی، ‏انٹرنیٹ ووٹنگ ٹاسک فورس بطورتھرڈ پارٹی نادرا کے آئی ووٹنگ سافٹ وئیر کا ٹیکنیکل آڈٹ کرے گی۔

الیکشن کمیشن کے مطابق ٹاسک فورس نادرا کے انٹرنیٹ ووٹنگ سسٹم کا جائزہ بھی لے گی، ٹاسک فورس میں ملکی اور بین الاقوامی ماہرین شامل ہیں۔

الیکشن کمیشن نے چیف ایگزیکٹو آفیسر آئی ٹی بٹلر دبئی ڈاکٹر محمد منشاد ستی کی سربراہی میں یہ ٹاسک فورس قائم کی ہے۔

ذرائع الیکشن کمیشن کا کہنا ہے کہ ٹاسک فورس دس دن میں اپنی سفارشات پیش کرے گی اور رپورٹ سپریم کورٹ کو بھی پیش کی جائے گی،جس کے بعد سمندر پار پاکستانیوں کو 2018 کے انتخابات میں ووٹ کی سہولت دینے کا فیصلہ کیا جائے گا۔

ٹاسک فورس کا پہلا اجلاس کل الیکشن کمیشن سیکریٹریٹ میں ہوگا‏۔


مزید پڑھیں : نادرا نے بیرون ملک مقیم پاکستانیوں کے ووٹ ڈالنے کے لیے آن لائن سسٹم تیار کرلیا


یاد رہے کہ 12 اپریل کو سپریم کورٹ میں بیرون ملک مقیم پاکستانیوں کے ووٹ ڈالنے سے متعلق کیس کی سماعت مین چیئرمین نادرا کا کہنا تھا کہ بیرون ملک مقیم پاکستانیوں کی ووٹنگ کے لیے آن لائن سسٹم تیار کرلیا ہے۔

چیئرمین نادرا مبین یوسف نے سپریم کورٹ میں ویڈیو بریفنگ دیتے ہوئے کہا تھا کہ ووٹنگ سسٹم اردو اور انگلش میں بنایا گیا ہے، ووٹر کی شناخت پاسپورٹ ٹریکنگ نمبر سے کی جائے گی، ایسا کوڈ دیا جائے گا جو روبوٹ نہ پڑھ سکے۔


خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

Comments

comments

یہ بھی پڑھیں