اسلام آباد : الیکشن کمیشن نے کراچی اور حیدر آباد کے بلدیاتی انتخابات سے متعلق درخواست پر تفصیلی فیصلے میں کہا ہے کہ بلدیاتی الیکشن پرانی ووٹر لسٹوں پر ہی ہوں گے۔
تفصیلات کے مطابق سندھ میں دوسرے مرحلے کے بلدیاتی انتخابات سے متعلق دارخوستوں پرالیکشن کمیشن نے 8 صفحات پر مشتمل تفصیلی فیصلہ جاری کردیا۔
فیصلے پر چیف الیکشن کمشنر اور دس ممبران کے دستحط ہیں موجود ہیں،تفصیلی فیصلے کے مطابق کراچی،حیدر آباد اور ٹھٹھہ ڈویژن میں بلدیاتی انتخابات شیڈول کے مطابق15جنوری کو ہوں گے۔
فیصلے میں کہا گیا ہے کہ چیف سیکرٹری اور آئی جی سندھ بلدیاتی انتخابات کے انتظامات کو یقینی بنائیں جبکہ سندھ میں صاف و شفاف بلدیاتی انتخابات کے لئے قانون نافذ کرنے والے ادارے پولنگ عملے کے ساتھ تعاون کریں۔
الیکشن کمیشن کا کہنا ہے کہ 29 اپریل کوانتخابی شیڈول کے اعلان کے وقت صرف پرانی ووٹرز فہرستیں موجود تھیں، پولنگ کی تاریخ میں تبدیلی سے نئی ووٹر لسٹ کا اطلاق نہیں ہوتا۔
فیصلے کے مطابق ایم کیوایم کی نئی ووٹرز لسٹ پر انتخابات کرانے کی استدعا مسترد اور جماعت اسلامی کی بروقت انتخابات سے متعلق دارخوست منظور کی جاتی ہے جبکہ ایڈیشنل ایڈوکیٹ جنرل سندھ کی التواء کی دارخوست مسترد کی گئی۔
تحریری فیصلے میں واضح کیا گیا ایم کیو ایم کو سننے کا تفصیل سے موقع دیا گیا، ایم کیو ایم کے وکیل نے تسلیم کیا کہ انتخابی فہرستوں کا معاملہ پہلی بار اٹھایا گیا ہے۔
فیصلے میں مذید لکھا گیا انتخابات کا شیڈول جاری ہونے کے بعد انتخابی فہرستوں میں ردوبدل نہیں کی جاسکتا، بلدیاتی الیکشن پرانی ووٹر لسٹوں پر ہی ہوں گے۔
