اسلام آباد: الیکشن کمیشن نے کسان پیکج پر وزارت خزانہ سے جواب طلب کرلیا اور عدالت میں جمع کرائے گئے جواب کی کاپی بھی جمع کرانے کے احکامات صادر کر دیئے ہیں.
چیف الیکشن کمشنر سردار رضا خان کی سربراہی میں پانچ رکنی بینچ نے وزیراعظم کسان پیکج کیس کی سماعت کی، چیف الیکشن کمشنر کا کہنا تھا کہ انتخابی شیڈول کے اجرا کے بعد فنڈ جاری کرنا ضابطہ اخلاق کی خلاف ورزی ہے۔
سیکریٹری خزانہ نے بتایا کہ کسان پیکج بجٹ کا حصہ ہے۔ پیکج میں اعلان کی گئی شرح سود میں دو فی صد کی کمی کا وزارت خزانہ سے کوئی تعلق نہیں ۔
الیکشن کمیشن نے وزیراعظم کسان پیکج کیس کی سماعت یکم دسمبر تک ملتوی کردی ہے، حکومت نے کسانوں کو آسانیاں پہنچانے کیلئے چار حصوں پر مشتمل اس مراعاتی پیکج کا اعلان کیا تھا۔
اس کے علاوہ کھاد کی قیمتوں میں کمی ، چاول اور کپاس کے کاشتکاروں کو نقد امداد کی فراہمی بھی پیکج کا حصہ ہیں.
اے آر وائی نیوز کی ڈیجیٹل ڈیسک کی جانب سے شائع کی گئی خبریں