اسلام آباد : الیکشن کمیشن نے سندھ حکومت کو پرامن انتخابات کے انعقاد کیلئے فول پروف انتظامات کا حکم دے دیا۔
تفصیلات کے مطابق الیکشن کمیشن نے کراچی اورحیدرآباد میں بلدیاتی الیکشن کے حوالے سے اجلاس کا اعلامیہ جاری کردیا۔
اعلامیے میں کہا گیا ہے کہ کراچی اورحیدرآباد میں بلدیاتی الیکشن کل ہی ہوں گے، سندھ حکومت پُرامن انتخابات کیلئےفول پروف انتظامات کرے۔
الیکشن کمیشن کا کہنا تھا کہ صوبائی حکومت کے مراسلے پر غور کیا گیا، مراسلےمیں انتخابات ملتوی کرنےکی درخواست کی گئی تھی۔
اعلامیے میں کہا ہے کہ انتخابات شیڈول کے مطابق کرانے کا فیصلہ کیا گیا ہے، بلدیاتی انتخابات شیڈول کے مطابق کل ہوں گے۔
یاد رہے سندھ بلدیاتی انتخابات کے حوالے سے الیکشن کمیشن میں چیف الیکشن کمشنرسکندرسلطان راجہ کی زیرصدارت اہم مشاورتی اجلاس ایک گھنٹے جاری رہا۔
جس میں الیکشن کمیشن نے سندھ حکومت کی بلدیاتی انتخابات ملتوی کرنے کی استدعا مسترد کرتے ہوئے فیصلہ کیا کہ کراچی اور حیدر آباد میں بلدیاتی انتخابات کل ہی ہوں گے۔
خیال رہے سندھ حکومت کی طرف سے الیکشن کمیشن کو خط لکھا گیا تھا ، جس میں بلدیاتی انتخابات ملتوی کرنے کی درخواست کی گئی تھی اور کہا تھا اسٹیٹک ڈیوٹی کے لئے فوج اور ریجرز بھی دستیاب نہیں، سندھ آئی جی پولیس نے بھی ملتوی کرنے کی تجویز دی۔
