عائشہ گلالئی کی نااہلی کے لیے عمران خان کی درخواست مسترد -
The news is by your side.

Advertisement

عائشہ گلالئی کی نااہلی کے لیے عمران خان کی درخواست مسترد

اسلام آباد : عائشہ گلالئی کو نا اہل کرنے سے متعلق چیئرمین پاکستان تحریک انصاف عمران خان کی درخواست الیکشن کمیشن آف پاکستان نے مسترد کردی۔

تفصیلات کےمطابق الیکشن کمیشن آف پاکستان میں چیف الیکشن کمشنر جسٹس ریٹائرڈ سردار محمد رضا کی سربراہی میں 5 رکنی کمیشن نے عائشہ گلالئی کی نا اہلی کے لیے دائر عمران خان کی درخواست کی سماعت کی۔

الیکشن کمیشن نے پاکستان تحریک انصاف اور عائشہ گلالئی کے وکلا کے دلائل سننے کے بعد رواں ماہ 17 اکتوبر کو فیصلہ محفوظ کیا تھا جو آج سنایا گیا۔

الیکشن کمیشن کے 5 میں سے3 ممبران نے درخواست خارج کرنے کے حق میں فیصلہ سناتے ہوئے رکن قومی اسمبلی عائشہ گلالئی کے خلاف پاکستان تحریک انصاف کے ریفرنس کو مسترد کردیا۔

قبل ازیں الیکشن کمیشن آف پاکستان میں عائشہ گلالئی کے نا اہلی کے لیے دائر درخواست کی سماعت ہوئی اور عمران خان کے وکیل کی جانب سے دلائل دیے گئے تھے۔


تحریک انصاف میں خواتین کی عزت محفوظ نہیں، عائشہ گلالئی


خیال رہے کہ رواں برس یکم اگست کو عائشہ گلالئی نے پریس کانفرنس کے دوران پاکستان تحریک انصاف چھوڑنے کا اعلان کرتے ہوئے عمران خان پرسنگین الزمات عائد کیے تھے۔

یاد رہے کہ رواں سال 28 اگست کو پاکستان تحریک انصاف نے عائشہ گلالئی کی پارٹی رکنیت منسوخ کردی تھی جبکہ انہیں ڈی سیٹ کرانے کے لیے الیکشن کمیشن سے رجوع کیا تھا۔


اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

Comments

comments

یہ بھی پڑھیں