The news is by your side.

Advertisement

ماہر تعلیم سید خالد شاہ کا جسدِ خاکی جلد کراچی منتقل کیا جائے گا

کراچی: ماہر تعلیم اسکاؤٹ گروتھ کمشنر اور آل سندھ پرائیوٹ مینجمنٹ ایسوسی ایشن کے چیئرمین سید خالد شاہ کا جسدِ خاکی جلد کراچی منتقل کیا جائے گا۔

تفصیلات کے مطابق سید خالد شاہ کراچی سے اسلام آباد جاتے ہوئے بکھر کے مقام پر ایک مہلک حادثے میں اپنے ڈرائیور سمیت جاں بحق ہوگئے تھے۔

خاندانی ذرائع کا کہنا ہے کہ حادثے میں زخمی ہونے والے دو بیٹے طارق شاہ اور طاہر شاہ کی حالت نازک ہے، دونوں شدید زخمی حالت میں اسپتال میں زیرِ علاج ہیں۔

خیال رہے کہ بکھر کے مقام پر ٹریفک حادثے میں ماہر تعلیم خالد شاہ کی اہلیہ، بیٹی اور تین ماہ کا نواسا بھی زخمی ہوگئے تھے۔ خاندانی ذرائع کے مطابق تینوں معمولی زخمی ہوئے اور اب تیزی سے رو بہ صحت ہیں۔

قبل ازیں حادثے کے بعد زخمیوں کو ڈسٹرکٹ ہیڈ کوارٹر اسپتال بکھرمنتقل کردیا گیا تھا، حادثے کی جگہ سے علاقہ مکین خالد شاہ کی اہلیہ، بیٹی اور نواسے کو طبی امداد دینے کے بعد اپنے ساتھ بکھر کے مقامی محلے لے گئے تھے۔

خاندانی ذرائع نے اے آر وائی کے نمائندے کو بتایا کہ ماہر تعلیم سید خالد شاہ کا جسدِ خاکی قانونی کارروائی کے بعد کراچی منتقل کیا جائے گا۔

خاندانی ذرائع نے بتایا کہ انھیں خالد شاہ کے جسدِ خاکی کے ملنے کا انتظار ہے، کراچی لائے جانے کے بعد نمازِ جنازہ کا اعلان بھی کردیا جائے گا۔


خبر کے بارے میں اپنی رائے کا اظہار کمنٹس میں کریں، مذکورہ معلومات  کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

Comments

comments

یہ بھی پڑھیں