ریاض: سعودی عرب میں پولیس نے کارروائی کرتے ہوئے جعلی ریال بنانے والے دو ملزمان کو گرفتار کرلیا، جن کے قبضے سے جعلی 8 لاکھ ریال برآمد ہوئے۔
عرب میڈیا کی رپورٹ کے مطابق پولیس کی جانب سے یہ کارروائی سعودی دارالحکومت ریاض میں کی گئی، پولیس نے جعلی کرنسی نوٹ بنانے اور پھیلانے کے الزام میں 2 افراد کو گرفتار کیا، ملزمان میں ایک سعودی جبکہ دوسرا لبنانی باشندہ ہے۔
پولیس کا کہنا ہے کہ خفیہ معلومات ملی تھیں کہ ملزمان بڑی تعداد میں جعلی رقم سعودی عرب کی مختلف مارکیٹوں میں پھیلانا چاہتے تھے، اطلاع ملتے ہی تمام علاقے کے تھانوں کو خبر دار کیا گیا تاکہ ملزمان کو مارکیٹ میں جعلی نوٹ پھیلانے سے قبل ہی گرفتار کیاجاسکے۔
بعد ازاں پولیس نے کامیاب کارروائی کرتے ہوئے ملزمان کو گرفتار کرلیا۔
ملزمان نے ایک مکان میں اپنا ٹھکانہ تیار کیا ہوا تھا جہاں سے وہ جعلی نوٹ بناتے تھے اور ان کا اہم مقصد بازاروں میں اس کی ترسیل تھی جسے پولیس نے ناکام بنادی، ملزمان کی عمریں 40 اور 50 برس کے درمیان ہیں ان سے مزید تحقیقات جاری ہے۔
