The news is by your side.

بے بسی کی انتہا : بیٹے کو کتابیں نہ ملنے پر باپ نے خود کو آگ لگالی

قاہرہ : غریب باپ نے اپنے بیٹے کی تعلیم میں رکاوٹ ڈالنے پر اسکول کے باہر کھڑے ہوکر خودکشی کی کوشش کی، سوشل میڈیا پر واقعے کیخلاف سخت غم و غصے کا اظہار کیا جارہا ہے۔

تفصیلات کے مطابق مصر میں ایک مجبور باپ جو اپنے بیٹے کے تعلیمی اخراجات اٹھانے سے قاصر تھا جس کے باعث اس نے اسکول انتظامیہ سے کورس کی کتابیں دینے کی درخواست کی تھی۔

اسکول کی پرنسپل نے بہانہ بنا کر طالب علم کو نہ صرف کتابیں فراہم کرنے سے صاف انکار کردیا بلکہ اس کے ساتھ نامناسب سلوک بھی کیا جس کا اس شخص کو بہت صدمہ تھا۔

البحیرہ کمشنری کے قصبے میں واقع اسکول کے سامنے طالب علم کے والد نے دل برداشتہ ہوکر مبینہ طور پر تیل چھڑک کر خود کو آگ لگالی۔

اقدام خود سوزی کے بعد وہاں موجود افراد نے زخمی کو تشویشناک حالت میں قریبی اسپتال منتقل کیا گیا، ابتدائی تحقیقات سے پتہ چلا ہے کہ بچہ پرائمری اسکول کی پہلی کلاس میں زیرتعلیم ہے۔

متاثرہ شخص کی اہلیہ کا کہنا ہے کہ اس کا شوہر اسکول پرنسپل کے نامناسب سلوک سے انتہائی دل برداشتہ تھا جبکہ بیٹے کی فائل بھی اسکول کے سرکاری ریکارڈ سے غائب کردی گئی تھی۔

خاتون نے بتایا کہ واقعے کے بعد اسکول انتظامیہ نے گھر آکر کورس کی کتابیں دیں اور بچے کی اسکول فائل بھی مل گئی اور اس کا اندراج کرلیا گیا ہے۔

واقعے کی اطلاع ملتے ہی متعلقہ حکام نے نوٹس لے کر واقعے کی ذمہ دار اسکول پرنسپل کوعہدے سے ہٹا دیا اور مزید تحقیقات کیلئے کمیٹی کے سامنے طلب کرلیا۔

Comments

یہ بھی پڑھیں