دوحہ: مصر میں سیکیورٹی فورسز کے قافلے پر خود کش حملے کے نتیجے میں سات افراد ہلاک جبکہ پندرہ سے زائد زخمی ہوگئے۔
تفصیلات کے مطابق مصر کے جزیرہ نما سینا میں الشیخ زوید کے مقام پر 15 سالہ لڑکے نے خود کش حملہ کیا جس کے نتیجے میں 7 افراد ہلاک اور کم سے کم 26 زخمی ہوگئے۔
عرب ٹی وی کے مطابق مصری وزارت داخلہ کی طرف سے جاری کردہ ایک بیان میں کہا گیا کہ سیکیورٹی فورسز کا ایک گروپ الشیخ زوید میں السوق کے مقام پر معمول کا سرچ آپریشن جاری رکھے تھا کہ اس دوران اچانک ایک 15 سالہ لڑکے نے خود کو سیکیورٹی فورسز کے قریب دھماکے سے اڑا دیا۔
اس حملے میں فوج کے دو افسر اور ایک پولیس اہلکار جبکہ تین عام شہری جن میں ایک 6 سالہ بچہ شامل ہے مارے گئے۔
خود کش حملے میں 26 افراد زخمی ہوئے، انہیں اسپتال منتقل کردیا گیا ہے، اطلاعات کے مطابق حملہ آور کم عمر تھا جس کی وجہ سے سیکیورٹی فورسز کو اس پر شک نہیں ہوا۔
جب اس نے مشکوک حرکات شروع کیں تو پولیس کو شبہ ہوا، حکام نے اس کا پیچھا کیا تو اس نےخود کو دھماکے سے اڑا دیا۔ واقعے کے بعد پولیس نے علاقے کو گھیرے میں لے کر مزید سرچ آپریشن شروع کردیا تاہم کسی شخص کی گرفتاری عمل میں نہیں لائی گئی۔
مصرمیں نامعلوم افراد کی فائرنگ، پولیس اہلکار اور ڈرائیور ہلاک
خیال رہے کہ گذشتہ دنوں مصری دارالحکومت کے مشرقی علاقے میں نامعلوم ملزمان کی فائرنگ سے پولیس اہلکار ڈرائیور سمیت ہلاک ہوگیا تھا۔
