قاہرہ: مصر میں قائم ایک سکیورٹی چیک پوسٹ پر حملہ کرنے کے جرم میں 6 افراد کو سزائے موت سنا دی گئی جبکہ دیگر ملزمان کو عمر قید کی سزا ہوئی۔
تفصیلات کے مطابق 2016 میں مصر کی ایک چیک پوسٹ پر دہشت گرد حملہ کیا گیا تھا اسی جرم میں عدالت نے چھ افراد کو سزائے موت سنائی ہے، جبکہ دیگر ملزمان کو عمر قید کی سزا ہوئی ہے۔
غیر ملکی خبر رساں ادارے کے مطابق مصر کی ایک عدالت کی جانب سے دہشت گرد حملے میں ملوث دو ملزمان کو عمر قید جبکہ چار دیگر ملزمان کو تین سے لے کر پندرہ برس تک قید کی سزائیں بھی سنائی گئی ہیں۔
مصر: عدالت نے حکومت مخالف مظاہروں پر 75 افراد کو سزائے موت سنادی
عدالت کی جانب سے عمر قید کی سزا پانے والوں میں ایک ایسا بھی ملزم شامل ہے جس کی عمر صرف پندرہ برس بتائی گئی ہے۔
خیال رہے کہ گذشتہ ماہ مصر کی عدالت کی جانب سے اپنے اہم فیصلہ میں 2013 میں حکومت مخالف مظاہرے میں ملوث ہونے پر 75 افراد کو سزائے موت سنائی گئی تھی۔
واضح رہے کہ سزائے موت پانے والے تمام افراد سابق صدر مرسی کے حامی تھی، سزا پانے والے مظاہرین پر فوجداری عدالت میں مقدمہ چلایا گیا تھا، یاد رہے کہ اخوان المسلون کے کارکنان بھی سزائے موت پانے والوں میں شامل تھے۔
دوسری جانب مصر کے سرکاری اخبار کی ایک رپورٹ میں کہا گیا ہے کہ رواں برس آٹھ ستمبر کو چھ سو سے زائد افراد کی سزائے موت پر عمل کیے جانے کا امکان ہے۔
