The news is by your side.

Advertisement

8 پاکستانی شہدا کی تدفین کل نیوزی لینڈ میں ہوگی‘ معظم شاہ

ویلنگٹن: ڈپٹی ہائی کمشنرمعظم شاہ کا کہنا ہے کہ شہید اریب کا جسد خاکی جلد پاکستان پہنچایا جائے گی۔

تفصیلات کے مطابق ڈپٹی ہائی کمشنر معظم شاہ نے اے آر وائی نیوز سے خصوصی بات چیت کرتے ہوئے بتایا کہ سانحہ کرائسٹ چرچ میں شہید ہونے والے 9 میں سے 7 پاکستانیوں کی میتیں ورثا کے حوالے کردی گئیں۔

انہوں نے بتایا کہ کل جمعہ کو کرائسٹ چرچ میں 8 پاکستانیوں کو سپردخاک کیا جائے گا جبکہ شہید اریب کی میت کو جلد پاکستان بھجوانے کی کوششیں کی جا رہی ہیں۔

ڈپٹی ہائی کمشنرمعظم شاہ کے مطابق کرائسٹ چرچ حملے میں 9 پاکستانی شہید ہوئے تھے۔

سانحہ کرائسٹ چرچ میں شہید ہونے والے افغان باشندے حاجی داؤد اورفجی سے تعلق رکھنے والے حافظ موسیٰ پٹیل کی نماز جنازہ ادا کردی گئی۔

دوسری جانب نیوزی لینڈ کی وزیراعظم جیسنڈا ایرڈن نے آج پریس کانفرنس کے دوران آٹومیٹک اورسیمی آٹومیٹک اسلحے پرپابندی کا اعلان کرتے ہوئے بتایا کہ مساجد پر حملے میں آٹومیٹک اور سیمی آٹو میٹک اسلحہ استعمال کیا گیا۔

نیوزی لینڈ کی پارلیمنٹ کا شہدائے کرائسٹ چرچ کوزبردست خراج عقیدت

یاد رہے کہ 19 مارچ کو سانحہ کرائسٹ چرچ کے بعد نیوزی لینڈ کی پارلیمنٹ کے پہلے اجلاس ہوا تھا جس میں وزیراعظم جیسنڈا ایرڈن نے حملہ آور کو دہشت گرد، مجرم اور انتہا پسند قرار دیا تھا۔

وزیراعظم کا کہنا تھا کہ حملہ آور دہشت گردی کے اپنے عمل سے بہت کچھ چاہتا تھا جس میں ایک چیز شہرت بھی ہے، اسی وجہ سے اس کا نام میں کہیں نہیں لوں گی۔

نیوزی لینڈ کی وزیراعظم جیسنڈا ایرڈن نے اجلاس کے دوران شہید پاکستانی نعیم راشد کو خراج عقیدت پیش کیا تھا۔

نیوزی لینڈ کی 2 مساجد میں فائرنگ‘ 49 افراد جاں بحق

واضح رہے کہ 15 مارچ کو نیوزی لینڈ کی دو مساجد میں دہشت گرد حملے کیے گئے جس کے نتیجے میں خواتین وبچوں سمیت 49 افراد جاں بحق اور 20 زخمی ہوئے تھے۔

مرکزی حملہ آور کی شناخت 28 سالہ برینٹن ٹیرنٹ کے نام سے ہوئی ہے اور وہ آسٹریلوی شہری ہے جس کی تصدیق آسٹریلوی حکومت نے کردی۔

Comments

comments

یہ بھی پڑھیں