The news is by your side.

ضمنی الیکشن کے سلسلے میں انتخابی مہم کا وقت ختم ہوگیا

قومی اسمبلی کے 8 حلقوں میں ضمنی انتخابات کے سلسلے میں جاری انتخابی مہم کا وقت ختم ہوگیا۔ 16 اکتوبر بروز اتوار انتخابی دنگل سجے گا۔

کراچی، پشاور، مردان، چارسدہ، ملتان، فیصل آباد اور ننکانہ صاحب میں 12 بجتے ہی انتخابی مہم کا وقت ختم ہوگیا۔ الیکشن کمیشن نے ضمنی انتخابات کے انعقاد کے لیے تمام تیاریاں مکمل کرلیں۔

الیکشن کمیشن کا کہنا ہے کہ انتخابی سامان کی وصولی سے نتائج تک پریذائیڈنگ افسران کو سکیورٹی فراہم کی جائے گی، ایف سی، رینجرز اور پولیس کی جانب سے الیکشن کے روز ڈیوٹی سر انجام دی جائے گی، پریذائیڈنگ افسران فارم 45 کی تصویر ریٹرننگ افسر کو واٹس ایپ کریں گے۔

پریذائیڈنگ افسران کو موبائل فون کی لوکیشن آن رکھنے کی ہدایت کی گئی ہے۔ فارم 45 کی اصل کاپی ریٹرننگ افسران کے حوالے کی جائے گی۔

الیکشن کمیشن کا کہنا ہے کہ امیدوار اپنے پولنگ ایجنٹ کی تربیت یقینی بنائیں، پریزائیڈنگ افسر دستخط شدہ فارم 45 کی کاپی ایجنٹ کو دینے کا پابند ہوگا۔

مانیٹرنگ کے لیے ریٹرننگ افسران نے خصوصی کنٹرول روم قائم کیے ہیں۔ کنٹرول رومز میں متعلقہ ڈی سی، پولیس، رینجرز اور فوجی حکام موجود ہوں گے۔ شکایات کے ازالے کے لیے صوبائی اور وفاقی سطح پر بھی کنٹرول روم قائم ہے۔ کنٹرول روم صبح 7 بجے سے نتائج مکمل ہونے تک فعال رہیں گے۔

Comments

یہ بھی پڑھیں