کل چیئرمین سینیٹ کے انتخاب ہوگا جس کے لیے پاکستان پیپلز پارٹی نے رابطوں کا عمل تیز کر دیا ہے اور خصوصی کمیٹی سیاسی جماعتوں سے رابطے کر رہی ہے۔
2 اپریل کو ہونے والے ایوان بالا کے انتخاب کے بعد اب کل چیئرمین سینیٹ کا انتخاب ہوگا۔ پی پی کی جانب سے چیئرمین سینیٹ کے لیے یوسف رضا گیلانی امیدوار ہیں جنہیں حکومتی اتحاد کی حمایت بھی حاصل ہے۔
دوسری جانب چیئرمین سینیٹ کے انتخاب کے معاملے پر پیپلز پارٹی نے ذاتی طور پر رابطوں کا عمل بھی تیز کر دیا ہے اور اس حوالے سے پارٹی کی جانب سے قائم کی گئی خصوصی کمیٹی کے اراکین مختلف سیاسی جماعتوں سے رابطے کر رہے ہیں۔
پی پی پی خصوصی کمیٹی میں شامل شیری رحمان اور نوید قمر نے چیئرمین سینیٹ کے امیدوار یوسف رضا گیلانی سے رابطہ کیا اور انتخابات کے لیے لائحہ عمل تشکیل دیا۔
شیری رحمان کا کہنا ہے کہ یوسف رضا گیلانی کو سینیٹ میں واضح حمایت حاصل ہے اور پیپلز پارٹی اپنے اتحادیوں کے ساتھ کل سینیٹ میں اپنی واضح برتری ثابت کرے گی۔
ان کا کہنا تھا کہ عوام اور کارکنان کل جیالے امیدوار کے چیئرمین سینیٹ بننے کا جشن منائیں گے۔
