واشنگٹن : امریکا کرونا وائرس نے تباہی مچائی ہوئی ہے اور اس دوران امریکی صدر ڈونلڈ ٹرمپ نے ‘صدارتی انتخابات اپنے وقت پر نومبر میں ہونے کا عندیہ دے دیا ہے’۔
غیر ملکی خبر رساں ادارے کی رپورٹ کے مطابق امریکا میں کرونا وائرس کی ہلاکت خیزی تیزی سے بڑھتی جا رہی ہے, کرونا کی جان لیوا وبا کے باعث امریکا میں چوبیس گھنٹوں کے دوران ساڑھے 1300 سے زائد افراد دم توڑ چکے ہیں جس کے بعد ہلاکتوں کی مجموعی تعداد 7402 ہوچکی ہے۔
ایسے وقت میں جب امریکا میں اڑھائی لاکھ سے زائد افراد کرونا وائرس میں مبتلا ہوچکے ہیں اور سیاسی حلقوں سے یہ حالات کی سنگینی کے باعث انتخابات ملتوی کرنے کی آوازیں آرہی ہیں امریکی صدر ڈونلڈ ٹرمپ نے جاری بیان میں کہا ہے کہ ‘مجھے نہیں معلوم انتخابات کے وقت کیا حالات ہوں گے لیکن صدارتی انتخابات اپنے وقت پر ہی ہوں گے’۔
ڈونلڈ ٹرمپ کا کہنا تھا کہ ووٹرز کو پولنگ بوتھ پر آکر ووٹ ڈالنا ہوں کیونکہ آن لائن ووٹنگ میں بہت سے مسائل آتے ہیں۔
امریکی صدر نے امریکی کمپنیوں پر میڈیکل سپلائی برآمد کرنے کی پابندی عائد کرتے ہوئے کہا کہ میڈیکل سپلائی جمع کرنے کی ذمہ داری ریاستوں کی ہے۔
خیال رہے کہ گزشتہ روز ڈونلڈ ٹرمپ نے کہا تھا کہ ہم وائرس سے تحفظ کے لیے دنیا کے بہترین لوگوں کے ساتھ کام کر رہے ہیں، اس دردناک صورت حال میں بھی لوگ سیاست سے باز نہیں آ رہے، یہ وقت لوگوں پر توجہ رکھنے کا ہے سیاست پر نہیں۔
