اسلام آباد : وزیراعظم شہباز شریف کی زیر صدارت شعبہ توانائی کے حوالے سے اعلیٰ سطح اجلاس منعقد ہوا، اجلاس میں توانائی بچت پلان کا بھی جائزہ لیا گیا۔
تفصیلات کے مطابق اجلاس میں گردشی قرضے پر قابو پانے کیلئے جامع حکمت عملی وضع کرنے کے حوالے سے غور و خوص کیا گیا۔ اجلاس سے خطاب کرتے ہوئے وزیراعظم نے متعلقہ محکمہ کو ہدایت دی کہ توانائی کے شعبے میں گردشی قرضے کو کم کیا جائے۔
انہوں نے کہا کہ سال 2013 سے 18 تک ہم گردشی قرض ختم کرنے کا عملی ثبوت دے چکے ہیں، محنت اور مؤثر حکمت عملی سے مسئلے پر دوبارہ قابو پالیں گے۔
وزیراعظم شہبازشریف کا کہنا تھا کہ توانائی اصلاحاتی عمل کی مدد سے گردشی قرض بتدریج ختم کیا جائے اور سوئی گیس کی تقسیم کار کمپنیاں بلہ ریکوری نظام فوری طور پر بہتر کریں۔
اس موقع پر وزیراعظم نے متعلقہ محکموں کو ہدایت دی کہ بجلی اور گیس صارفین پر کوئی اضافی بوجھ نہ ڈالا جائے، اس کے علاوہ اجلاس میں توانائی بچت پلان کا بھی جائزہ لیا گیا، مذکورہ پلان کل وفاقی کابینہ کے اجلاس میں پیش جائے گا۔
