The news is by your side.

Advertisement

وزیر اعظم کے سامنے پاکستان میں تیار کردہ الیکٹرانک ووٹنگ مشین کا عملی مظاہرہ

اسلام آباد: وزیر اعظم عمران خان کے سامنے پاکستان میں تیار کردہ الیکٹرانک ووٹنگ مشین کا عملی مظاہرہ کیا گیا، وزیر اعظم نے مشین کی کارکردگی پر اطمینان کا اظہار کر دیا۔

تفصیلات کے مطابق آج وزیر سائنس فواد چوہدری نے الیکٹرانک ووٹنگ مشین سے متعلق وزیر اعظم کو تفصیلی بریفنگ دی، ان کے سامنے الیکٹرانک ووٹنگ مشین سے انتخابی عمل کا عملی مظاہرہ بھی پیش کیا گیا۔

فواد چوہدری نے ووٹنگ کے طریقہ کار اور مشین کے مختلف فیچرز پر آگاہی دی، انھوں نے کہا ابھی مشین کو محدود پیمانے پر ٹیسٹ کیا گیا ہے لیکن نہایت حوصلہ افزا نتائج سامنے آئے، اس مشین کی مدد سے ووٹنگ کا عمل مکمل شفاف اور غیر جانب دار ہو جائے گا۔

بریفنگ میں بتایا گیا کہ مشین کی وجہ سے انتخابی عمل کے نتائج مکمل طور پر محفوظ اور فوری طور پر میسر آ سکیں گے، اس مشین کی تیاری میں ماضی میں اٹھائے جانے والے مسائل کا حل یقینی بنایا گیا ہے۔

بریفنگ کے مطابق یہ الیکٹرانک ووٹنگ مشین وزرات سائنس، کامسیٹس اور این آئی ای کی مشترکہ کاوش سے تیار ہوئی ہے۔

وزیر اعظم عمران خان نے مشین کے نمونے کی ورکنگ پر اطمینان کا اظہار کیا اور وزارت سائنس اینڈ ٹیکنالوجی اور کامسیٹس کی کاوشوں کو سراہا۔

انھوں نے کہا بد قسمتی سے ماضی میں ہونے والے تقریباً ہر الیکشن پر سوالات اٹھائے گئے، اس سے نہ صرف انتخابی و جمہوری عمل متاثر ہوا، بلکہ عوام کے اعتماد کو ٹھیس پہنچی، ملکی جمہوری اور انتخابی عمل اب مزید کسی ایسے نظام کا متحمل نہیں ہو سکتا، ماضی کے تجربے کی روشنی میں انتخابی عمل کو ہر ممکن شفاف بنائیں گے، شفاف الیکشن کے لیے الیکٹرانک ووٹنگ مشین متعارف کرانا ملکی مفاد میں ہے۔

وزیر اعظم نے ہدایت کی کہ الیکٹرانک مشین کو جدید سیکیورٹی فیچرز سے مزین کرنے کی کوششیں تیز کی جائیں، اس حوالے سے ترقی یافتہ ملکوں کے تجربے کو بھی سامنے رکھا جائے۔

Comments

یہ بھی پڑھیں