The news is by your side.

Advertisement

امارات ایئر لائن: 120 شہروں کے مسافر بڑی سہولت حاصل کریں گے

دبئی: امارات 6 براعظموں میں ایاٹا (IATA) ٹریول پاس نافذ کرنے والی پہلی ایئر لائن بن گئی۔

تفصیلات کے مطابق امارات چھ براعظموں میں انٹرنیشنل ایئر ٹرانسپورٹ ایسوسی ایشن (ایاٹا) ٹریول پاس لاگو کرنے والی پہلی ایئر لائن بن گئی ہے۔

اپریل میں اپنے دبئی مرکز سے منتخب راستوں پر کامیاب ٹرائلز کے بعد امارات ایئر لائن نے آہستہ آہستہ ایاٹا ٹریول پاس ایپ کو جون میں 12 روٹس پر صارفین تک بڑھایا، اور ایئر لائن نے اب ایاٹا کے ساتھ اپنے عالمی نیٹ ورک پر اس ڈیجیٹل ٹریول پاس کو نافذ کرنے کے لیے معاہدہ کر لیا ہے۔

یہ ڈیجیٹل ٹریول پاس فی الحال 50 شہروں سے سفر کرنے والے امارات کے صارفین کے لیے دستیاب ہے، توقع ہے کہ تمام 120 سے زائد مقامات پر اس کا افتتاح اکتوبر تک مکمل ہو جائے گا۔

امارات ایئر لائن کے چیف آپریٹنگ آفیسر عادل الریدھا نے کہا کہ ایاٹا ٹریول پاس امارات ایئرلائن کی ٹیکنالوجی میں سرمایہ کاری کی تازہ ترین مثال ہے، ہم اپنے صارفین کے لیے آرام دہ سفر فراہم کرتے ہیں

ایاٹا کے سینئر نائب صدر آپریشنز نک کیرین نے کہا کہ امارات ایئر لائن کی جانب سے ٹریول پاس کے نفاذ سے سفر کے لیے درکار صحت کے بے تحاشا پیچیدہ اسناد کا مسئلہ حل ہو جائے گا، مسافروں کو ایک محفوظ خودکار عمل کے ذریعے دستاویزات کی جانچ کے لیے قطاروں میں کھڑے ہونے اور بھیڑ سے نجات ملے گی۔

ایاٹا ڈیجیٹل ٹریول پاس کے ذریعے اب مسافر اپنے سفر سے متعلق، ویکسین لگوانے یا ٹیسٹ کرنے کے سلسلے میں بالکل درست معلومات حاصل کر سکیں گے۔

اس کے ذریعے مسافر اپنے ڈیپارچر لوکیشنز پر کرونا وائرس ٹیسٹ کرنے والے مستند مراکز تک رسائی کر سکیں گے، اور مسافروں کو اپنے تمام سفری دستاویزات کو ڈیجیٹل طور پر سنبھالنے کی سہولت دستیاب ہوگی، جن میں منظورہ شدہ لیبارٹریز سے ٹیسٹ نتائج اور سرٹیفکیٹس براہ راست وصول کرنا شامل ہیں۔

نیز، مسافر ایاٹا ٹریول پاس ایپ کے ذریعے 1500 سے زیادہ کووِڈ نائنٹین ٹیسٹ لیبز تک رسائی حاصل کر سکیں گے، اور یہ تعداد مزید بڑھائی جا رہی ہے۔

Comments

یہ بھی پڑھیں