The news is by your side.

Advertisement

اماراتی فضائی سروس مکمل بحالی سے متعلق اہم اعلان

دبئی: ایمریٹس ایئرلائن کے صدر ٹم کلارک نے کہا ہے کہ فضائی کمپنی کے آپریشنز 2022 تک مکمل طور پر بحال ہو جائیں گے۔

تفصیلات کے مطابق عرب نیوز کو دیے گئے ایک انٹرویو میں ایمریٹس ایئر لائن کے صدر کا کہنا تھا کہ کرونا وبا کی وجہ سے متاثرہ فضائی سروس بحال ہوتی جا رہی ہے، مسافروں کی تعداد میں اضافہ ہو رہا ہے، کمپنی کے آپریشنز اگلے سال موسم گرما تک مکمل طور پر بحال ہو جائیں گے۔

ٹم کلارک نے اس یقین کا اظہار کیا کہ وبا ختم ہوتے ہی فضائی سفر کے طلب کا سونامی آئے گا، لوگ ہر طرح کے مقصد کا سفر کرنے نکلیں گے، کیوں کہ یہ گزشتہ 15 سے 16 ماہ سے نکلنا چاہتے ہیں اور نہیں نکل سکے، اس لیے 2022 تک ایمریٹس سمیت دیگر ایئرلائنز کے آپریشنز مکمل طور پر بحال ہو جائیں گے۔

فضائی کمپنی کے صدر کے مطابق وبا کی وجہ سے گزشتہ سال ایئرلائن کو 5.5 ارب ڈالر کا خسارہ ہوا، انھوں نے دبئی کے بارے میں بات کرتے ہوئے بتایا دبئی عالمی مرکز کے طور پر دوبارہ ابھرے گا، اور مضبوط ہوگا۔

یو اے ای کرونا ویکسینیشن میں سب سے آگے نکل گیا

انھوں نے کہا جب کہ دنیا بھر میں کرونا وائرس کے باعث مشکلات بڑھ رہی تھیں اور وائرس کی نئے اقسام سامنے آ رہی تھیں، دبئی نے معیشت اور فضائی سروس کی سرگرمیاں شروع کر کے ایک درست قدم اٹھایا۔

ٹم کلارک کا کہنا تھا کہ انھوں نے برطانیہ کی حکومت کے سامنے اپنی رائے رکھی ہے کہ متحدہ عرب امارات کو ریڈ لسٹ میں رکھنے کی کوئی وجہ نہیں، خاص طور پر جب ملک مسائل سے نمٹنے کے لیے پیش پیش ہے۔

Comments

یہ بھی پڑھیں