لندن : متحدہ عرب امارات کی ایمریٹس ایئرلائن کو ایک بار پھر دنیا کی سب سے بہترین فضائی کمپنی قرار دیا گیا،آخری بار یہ اعزاز فضائی کمپنیکو 2013 میں ملا تھا.
تفصیلات کے مطابق متحدہ عرب امارات کی ایمریٹس ایئرلائن کو یہ اعزاز کنزیومر ایوی ایشن ویب سائٹ اسکائی ٹریکس نے دیا ہے،یہ گزشتہ پندرہ برسوں میں چوتھی بار ہے کہ ایمریٹس ایئر لائن کو دنیا کی نمبرون فضائی کمپنی قرار دیا گیا ہے جبکہ آخری بار اسے یہ اعزاز 2013 میں ملا تھا.
دنیا کی سو بہترین فضائی کمپنیوں میں پاکستان کی کوئی بھی سرکاری یا غیرسرکاری ایئرلائن شامل نہیں،جبکہ انڈیا کی ایک کمپنی انڈیگو،سری لنکن ائیرلائنز یہاں تک کہ ایتھوپین ایئرلائنز بھی اس فہرست کا حصہ ہے.
متحدہ عرب امارات کی ایمریٹس ایئرلائن دنیا کی سب سے بڑی فضائی کمپنی ہے جس کے بیڑے میں ڈھائی سو طیارے شامل ہیں.
اس ویب سائٹ نے جنوبی کوریا کی آسیانہ ایئرلائنز کو دنیا کی سب سے بہترین اکنامی کلاس،جبکہ ترکش ایئرلائنز کو یورپ کی سب سے بہترین فضائی کمپنی اور سب سے سستی اور بہترین کمپنی کا اعزاز ملائیشیاکی ایئر ایشیاءکو دیا.
یاد رہےکہ گزشتہ برس سرفہرست رہنے والی قطر ایئرویز اس بار دوسرے نمبر پر موجود ہے.
