ابوظبی: متحدہ عرب امارات کے ابوظبی کے علاقے بنی یاس میں گھر میں ہولناک آتشزدگی کے نتیجے میں ایک ہی خاندان کے 8 افراد جاں بحق ہوگئے۔
عرب میڈیا کے مطابق متحدہ عرب امارات کے شہر ابوظبی کے علاقے بنی یاس میں ایک مکان میں ہولناک آتشزدگی کے نتیجے میں چھ بچوں اور دو خاتون سمیت 8 افراد جاں بحق ہوگئے جبکہ گھر کی مالکن کو تشویشناک حالت میں اسپتال منتقل کردیا گیا ہے۔
زخمی خاتون کے شوہر ال کوتھین کا کہنا ہے کہ گھر کے اندر آٹھ افراد موجود تھے جو جاں بحق ہوگئے ہیں ان میں دو چھوٹی بیٹیاں بھی شامل ہیں۔
جاں بحق ہونے والے آٹھوں افراد کی نماز جنازہ نماز عصر کے بعد مقبرہ مسجد بنی یاس میں ادا کی گئی، زخمی خاتون کی حالت تشویشناک بتائی جارہی ہے جنہیں اسپتال میں طبی امداد دی جارہی ہے۔
#فاجعه #بني ياس pic.twitter.com/Bxj2bayBnm
— remani🐰 (@remani45) October 2, 2018
سوشل میڈیا پر مذکورہ افراد کے جاں بحق ہونے کی مذمت کی گئی ہے اور جاں بحق افراد کے اہلخانہ سے تعزیت کا سلسلہ جاری ہے۔
ابوظبی سول ڈیفنس کی جانب سے جاری کردہ اعلامیے میں کہا گیا ہے کہ مذکورہ واقعہ آج صبح پیش آیا جبکہ ملکی سطح پر مہم بھی چلائی جائے گی کہ کس طرح آتشزدگی کے نتیجے میں قیمتی جانوں کو محفوظ بنایا جاسکتا ہے۔
واضح رہے کہ رواں سال جنوری میں متحدہ عرب امارات کے ایک گھر میں آگ لگنے کے بعد دھواں پھیل جانے اور دم گھٹنے سے 7 بہن بھائی جاں بحق ہوگئے تھے، یہ افسوسناک واقعہ مشرقی ریاست فجیرہ میں پیش آیا تھا، جاں بحق ہونے والوں میں تین بچے اور چار بچیاں شامل تھیں۔
