آسکر ایوارڈ یافتہ اداکارہ ایما اسٹون اور رائٹر ڈیو میگرے کی منگنی کی باقاعدہ تصدیق ہوگئی جس کے بعد تمام قیاس آرائیوں نے دم توڑ دیا۔
بین الاقوامی میڈیا اور ہالی ووڈ انڈسٹری میں ایما اسٹون سے متعلق 2 سال سے قیاس آرائیاں جاری تھیں کہ انہوں نے اسکرپٹ رائٹر سے منگنی کرلی ہے مگر اس حوالے سے اداکارہ نے کوئی تردید یا تصدیق نہیں کی تھی۔
ایما اسٹون اور ڈیو کو کئی تقاریب جبکہ سیر و تفریح کرتے ہوئے ایک ساتھ بھی دیکھا گیا البتہ انہوں نے تمام باتوں کے باوجود خاموشی اختیار کر رکھی تھی تاہم اب اسکرپٹ رائٹر نے اس راز کو خود ہی افشاں کردیا۔
ڈیو نے سماجی رابطے کی ویب سائٹ پر ایما کے ساتھ بنائی گئی تصویر شیئر کی جس میں وہ سب کو اپنے ہاتھ کی انگوٹھی دکھا رہی تھیں اور دونوں بہت خوش تھے۔
اداکارہ کی منگنی کا باقاعدہ اعلان ہونے پر مداحوں اور دوستوں نے انہیں مبارک باد پیش کی اور مستقبل کے لیے نیک خواہشات کا اظہار کیا۔
ایما اسٹون کے قریبی عزیز نے اس بات کی تصدیق کی کہ ڈیو نے جو تصویر سوشل میڈیا پر شیئر کی وہ منگنی کی ہے جس میں صرف منتخب لوگوں نے شرکت کی تھی۔
غیرملکی میڈیا رپورٹ کے مطابق ایما اور ڈیو کی پہلی ملاقات 2016 میں ہوئی جس کے بعد دونوں کی دوستی ہوئی اور پھر اگلے سال وہ ایک دوسرے کی محبت میں گرفتار ہوگئے تھے۔
دوسری جانب ایما اسٹون نے بھی سماجی رابطے کی ویب سائٹ پر ڈیو کے ساتھ بغیر کچھ لکھے تصویر شیئر کی جس میں انہوں نے دل والا ایموجی بنایا۔
