ابوظہبی : کورونا وائرس سے بچاؤ کیلئے کیے گئے اقدامات کے تحت متحدہ عرب امارت کی ریاست ابوظبی میں داخلے کیلئے نیا نظام متعارف کرادیا گیا۔
تفصیلات کے مطابق متحدہ عرب امارات (یو اے ای) میں کورونا وبا کے مسائل اور بحرانوں سے نمٹنے پر مامور کمیٹی نے ابوظبی آنے والوں کے لیے داخلے کا نظام اپ ڈیٹ کیا ہے۔ داخلے کے تمام پوائنٹس پر تیز رفتار چیکنگ کے لیے ای ڈی ای سسٹم ٓمتعارف کرایا گیا ہے۔
الامارات کے ذرائع ابلاغ کے مطابق ابوظبی میڈیا سینٹر نے ٹویٹر بیان میں کہا کہ کورونا وائرس سے متاثرین کا پتہ لگانے کے لیے جدید ترین ٹیکنالوجی کا استعمال کیا جا رہا ہے۔
ای ڈی ای سسٹم کے تحت ممکنہ متاثرین کے کیسز فیلڈ ٹیسٹ سینٹر کے حوالے کیے جاتے ہیں جہاں اینٹی باڈیز کا مفت ٹیسٹ ہوتا ہے، 20 منٹ کے اندر ٹیسٹ رزلٹ آجاتا ہے۔
أبوظبی میں کورونا سے متاثرین کی شرح کم ہورہی ہے، حفاظتی تدابیر کی سختی اور مسلسل پابندی کے باعث وبا کنٹرول میں ہے۔
ای ڈی ای ٹیسٹ آر این اے وائرس سے نکلنے والی مقناطیسی لہر چانچنے والی ٹیکنالوجی استعمال کر رہی ہے۔ یہ تین سیکنڈ کے اندر موبائل میں ایپ کے ذریعے وائرس کا پتہ لگا لیتی ہے، اس ٹیسٹ میں نجی کوائف جمع نہیں ہوتے، پرائیویسی کا خیال رکھا جاتا ہے۔
