کراچی: شہر ِ قائد میں ماحولیات کے تحفظ کے لیے سرگرم ایک نوجوان نے ایک سرسبز و شاداب درخت کو کٹنے سے بچالیا۔
تفصیلات کے مطابق کراچی کے علاقے محمود آباد میں محمد عرفان نامی ایک نوجوان نے موبائل شاپ کے باہر اگےتناور درخت کو کٹنے سے بچالیا۔
محد عرفان کے مطابق جب اس نے درخت کو کاٹنے کی وجہ پوچھی تو دوکاندار نے بتایا کہ اس درخت کے سبب ہماری دوکان کا سائن بورڈ درست طریقے سے نظر نہیں آرہا جس کی وجہ سے وہ اس درخت کو کاٹ رہا ہے۔
دوکاندار کے جواب پر نوجوان نے کہا کہ یہ کوئی معقول وجہ نہیں اور احتجاج کرنا شروع کردیا‘ جس میں محلے کےدیگر افراد بھی شریک ہوگئے اور مجبوراً دوکاندار کو اپنا ارادہ ملتوی کرنا پڑا ۔
خیال رہےکہ دنیا بھر میں درخت شدید خطرات کا شکار ہیں اوران کے تحفظ کے لیے اقوام متحدہ نے عالمی مقاصد بھی طےکیے ہیں اور پاکستان اس عالمی معاہدے میں شامل ہے۔
یاد رہے کہ کسی بھی ملک کے قدرتی آب و ہوا کو برقرار رکھنے کے لیے کل رقبے کا25فیصد جنگلا ت پر مشتمل ہونا چاہیے بصورت دیگر اس ملک کو سنگین ماحولیاتی مسائل کا سامنا کرنا پڑسکتا ہے۔
بد قسمتی سے پاکستان جو کہ ایک انتہائی زرخیز ملک ہے ‘ سرکاری اعدادوشمار کے مطابق محض پانچ فیصدر قبہ جنگلات سے ڈھکا ہوا ہے اور شہری آبادی میں بھی شجر کاری کو لے کرخاص رغبت نہیں پائی جاتی جس کے سبب بالخصوص شہروں کا موسم تیزی سے تبدیل ہورہا ہے اور درجہ حرارت میں اضافہ بھی دیکھنے میں آرہا ہے۔
واضح رہے کہ اسلام جو کہ ایک مکمل ضابطہ حیات ہے چودہ سو سال قبل بلاضرورت درخت کاٹنے سے منع کرچکا ہے اور نا صرف یہ کہ اپنے بلکہ دشمن کے علاقے کے درخت کی حفاظت کرنے کا بھی حکم دیا گیا ہے۔
