ترک صدر رجب طیب اردوان نے دہشتگرد قرار دی گئی تنظیم پی کے کے کیخلاف عراق میں مشترکہ آپریشن کا عندیہ دے دیا۔
استنبول کی تاریخی مسجد میں نمازِ جمعہ کی ادائیگی کے بعد میڈیا سے گفتگو میں ترک صدر نے کہا کہ ہم عراق میں انسداد دہشتگردی کا مشترکہ آپریشن کر سکتے ہیں۔
انہوں نے عراق کے سنجار ریجن میں پی کے کے کیخلاف آپریشن کا اشارہ تو دیا لیکن مستقبل قریب میں ایسی کسی بھی کارروائی کے حتمی تاریخ کا اعلان نہیں کیا۔
ان کا کہنا تھا کہ ترکی عراق کے ساتھ ہمہ وقت انسداد دہشتگردی آپریشن کے لیے تیار ہے اور اس طرح کے کسی بھی آپریشن کا کھلم کھلا اعلان نہیں کرتا۔
ترک صدر نے قبل ازوقت انتخابات کے تاثر کو سختی سے مسترد کرتے ہوئے دوٹوک الفاظ میں کہا کہ انتخابات کے قبل از وقت ہونے کا کوئی امکان ہی نہیں ہے۔
انہوں نے واضح طور پر کہا کہ الیکشن اپنے مقررہ وقت پر جون 2023 میں ہی ہوں گے۔ کورونا ویکسین سے متعلق ترک صدر نے بتایا کہ ویکسین کی دوسری کھیپ آج پہنچ جائے گی۔
