خرطوم : معزول سوڈانی صدر عمر البشیر کی بھابی نوری الھدیٰ کو جیل میں قید شوہر کو فرار کرنے کی منصوبہ بندی اور جیل حکام کو زہر دینے کے الزام میں گرفتار کیا ہے۔
تفصیلات کے مطابق سوڈان کے معزول صدر عمر البشیر کے بھائی کی اہلیہ نوری الھدیٰ محمد شفیع کو حراست میں لیا گیا ہے جن پر کوبر جیل میں قید اپنے شوہر کو جیل سے فرار کرنے کی منصوبہ بندی کا الزام ہے۔
عرب خبر رساں ادارے کا کہنا تھا کہ اس مقصد کے لیے اس نے جیل اہلکاروں کو زہر دینے کر ہلاک کرنے کی کوشش کی، اس پر آئین کے آرٹیکل 130 کے تحت اقدام قتل کا مقدمہ چلانے کی تیاری کی جا رہی ہے۔
سوڈانی پراسیکیوٹر کے ذرائع کا کہنا تھا کہ نوری الھدیٰ محمد شفیع کو حراست میں لے کر اس کے خلاف قانون کے مطابق اقدام قتل کے جرم میں مقدمہ چلایا جائے گا۔
ذرائع کا کہنا ہے کہ نوری الھدیٰ کا شوہر اور معزول صدر عمر البشیر کا بھائی اس وقت کوبر جیل میں قید ہے۔
نوری الھدیٰ اپنے شوہر کو جیل سے فرار کرنا چاہتی تھی، اس نے اس مقصد کے لیے جیل کےافسران کو زہر دینے کی کوشش کی تھی۔
عرب خبر رساں ادارے کا کہنا تھا کہ اہم فوجی عہدے پر تعینات رہنے والی نوری الھدیٰ گرفتاری تک اس منصب پر فائز تھی۔
مقامی میڈیا کے مطابق جیل اہلکاروں کو زہر دینے کا انکشاف اس وقت ہوا جب جیل کے متعدد افسران کا پیٹ اور معدے میں شدید تکلیف کی شکایت پر ان کا طبی معائنہ کیا گیا تو پتا چلا کہ انہیں مضر صحت کھانا دیا گیا ہے اور یہ کھانا نوری الھدیٰ کی طرف سے بھجوایا گیا تھا۔
جیل میں اہلکاروں کو زہریلا کھانا کھلائے جانے کے کوبر جیل میں خوف کی فضاء پائی جا رہی ہے۔
