کراچی : جوڈیشل مجسٹریٹ کی موجودگی میں مبینہ زہریلی گیس سے جاں بحق افراد کی قبر کشائی کا عمل جاری ہے، جاں بحق افراد کا پوسٹ مارٹم کیا جائے گا اور سیمپل لیے جائیں گے۔
تفصیلات کے مطابق کراچی میں کیماڑی کے علاقے علی محمد گوٹھ میں مبینہ زہریلی گیس سے 18 اموات کے معاملے پر عدالتی احکامات کے بعد جوڈیشل مجسٹریٹ کی موجودگی میں بلدیہ یوسف شاھ قبرستان میں جاں بحق افراد کی قبر کشائی جاری ہے۔
قبر کشائی کے لئے پولیس سرجن ڈاکٹر سمعیہ سید کی جانب سے میڈیکل بورڈ تشکیل دیا گیا ہے۔
میڈیکل بورڈ میں ڈاؤ یونیورسٹی فارنزک میڈیسن کے ہیڈ ڈاکٹر ذکی الدین، وومن میڈیکل پولیس آفیسر مہک عرفان، میڈیکو لیگل آفیسر سول اسپتال ڈاکٹر گلزار سولنگی، ڈاکٹر عمران اور ڈاکٹر نظام شامل ہیں۔
جاں بحق افراد کی قبر کشائی کرکے پوسٹ مارٹم کیا جائے گا اور سیمپل لئے جائیں گے۔
پوسٹ مارٹم کے ذریعے وجہ موت کا تعین کیا جائے گا اور پوسٹ مارٹم رپورٹ کو پولیس تحقیقات کا حصہ بنایا جائے گا۔
