کراچی: شہرقائد میں دلخراش واقعے سے انسانیت شرما گئی، وحشی اور درندہ صفت نامعلوم افراد نے نوزائیدہ بچی کو عمارت سے نیچے پھینک دیا۔
تفصیلات کے مطابق یہ افسوس ناک واقعہ کراچی کے علاقے منظور کالونی آئی سیکٹرآفریدی روڈ پر پیش آیا، جہاں نامعلوم افراد نے نوزائیدہ بچی دوسری منزل سے نیچے پھینک دی، کمسن بچی زمین پر گرنے کے بعد دیر تک تڑپتی رہی۔
بعد ازاں ریسکیو ادارے نے بچی کو فوری طور پر جناح اسپتال منتقل کیا۔
بدقسمتی سے کمسن زخموں کی تاب نہ لاتے ہوئے جاں بحق ہوگئی، پولیس نے واقعے پر فوری ایکشن لیتے ہوئے کارروائی کا آغاز کردیا ہے جبکہ عمارت میں موجود والدین کو بھی گرفتار کرلیا گیا ہے۔
پولیس کی نفری جائے وقوع پر پہنچ گئی ہے، متعلقہ ادارے کا کہنا ہے کہ جس وقت مذکورہ واقعہ پیش آیا اس وقت دونوں افراد عمارت میں ہی موجود تھے، ممکنہ طور پر گرفتار والدین ملوث ہوسکتے ہیں۔
البتہ تحقیقات کے بعد ہی اصل حقائق سامنے آئیں گے، ملزمان سے پوچھ گچھ جاری ہے۔
