میٹا کی حال ہی میں شامل کردہ ذیلی کمپنی فیس بک نے کہا ہے کہ وہ زیادہ خطرے والے اکاؤنٹس کے لیے دو عنصر کی تصدیق (2FA) کو لازمی بنائے گا، وہ اکاؤنٹس جنھیں ممکنہ طور پر ہیکرز نشانہ بنا سکتے ہیں۔
تفصیلات کے مطابق فیس بک نے مزید اکاؤنٹس کے لیے 2 فیکٹر آتھنٹکیشن لازمی قرار دے دیا ہے، تاکہ ان کی سیکیورٹی کو یقینی بنایا جا سکے۔
اس کا مقصد انسانی حقوق کے لیے سرگرم کارکنوں، سیاست دانوں اور صحافیوں کو اضافی سیکیورٹی فیچر فراہم کرنا ہے، فیس بک کی جانب سے پوری دنیا میں اس پابندی پر عمل آئندہ چند ماہ میں کیا جائے گا۔
فیس بک کے مطابق تمام صارفین کو نئے قانون پر عمل کرنے کے لیے کچھ وقت لگ سکتا ہے، کیوں کہ ہر کوئی پلیٹ فارم کو بہت زیادہ متحرک انداز سے استعمال نہیں کر سکتا۔
آزمائشی مراحل کے دوران 90 فی صد سے زیادہ افراد نے دیے گئے وقت کے اندر فیس بک پروٹیکٹ پروگرام اور ٹو فیکٹر آتھنٹکیشن پر عمل کیا۔
واضح رہے کہ اس پروگرام کا پائلٹ پروجیکٹ 2018 میں پیش کیا گیا تھا، اور اسے 2020 کے امریکی انتخابات سے پہلے وسعت دی گئی، تاکہ فیس بک پلیٹ فارم پر غلط استعمال اور انتخابی مداخلت کو پھیلنے سے روکا جا سکے۔
فیس بک کے مطابق یہ اب 1.5 ملین سے زیادہ اکاؤنٹس پر فعال ہو چکا ہے، اور رواں سال کے آخر تک امریکا، بھارت اور پرتگال سمیت 50 سے زیادہ ممالک تک پھیل جائے گا، اور 2022 میں اسے مزید وسعت دی جائے گی۔
