پشاور: سابق چیئرمین سینیٹ محمد میاں سومرو کے بھانجے بیرسٹر فہد ملک کے قتل میں ملوث مرکزی ملزم کو بیرون ملک فرار کی کوشش میں افغانستان جاتے ہوئے طور خم بارڈر سے گرفتارکرلیاگیا.
تفصیلات کےمطابق سیکورٹی اداروں نے بیرسٹر فہد ملک قتل کیس کے مرکزی ملزم راجہ ارشد کی بیرون ملک فرار کی کوشش ناکام بنادی، ملزم کو طورخم بارڈر سے گرفتار کرلیا گیا.
قانون نافذ کرنے والے اداروں کی ابتدائی پوچھ گچھ میں راجہ ارشدنے بیان دیا کہ وہ افغانستان کے ذریعے یورپ جا نا چاہتا تھا،پہلے چمن کے ذریعے بارڈر کراس کرنے کی کوشش کی اور اب طور خم بارڈر پر پکڑا گیا.
راجہ ارشد نے قانون نافذ کرنے والوں کو بتایا کہ اس کا پاسپورٹ منسوخ تھا،نام ای سی ایل پر تھا،اسی لیے افغانستان کے ذریعے یورپ جانے کی کوشش کی.
*فہد ملک قتل کیس،نعمان کھوکھر کی درخواست ضمانت مسترد
یاد رہے کہ گزشتہ روز فہد ملک قتل کیس کی سماعت ایڈیشنل سیشن جج پرویز قادرمیمن کی عدالت میں ہوئی ملزم کے وکیل نے عدالت سے استدعا کی کہ نعمان کھوکھر کی عبوری ضمانت میں توسیع دی جائے اور اسے انصاف کا موقع ملنا چاہیے.
عدالت نے ملزم نعمان کھوکھر کی عبوری ضمانت میں توسیع کی درخواست مسترد کرتےہوئے ملزم کو گرفتار کرکے تحقیقات مکمل کرنےکا حکم دیا تھاجس کے کچھ دیر بعد پولیس نے ملزم کو کمرہ عدالت کے باہر سے گرفتارکرلیاتھا.
*دو مسلح گروپوں میں تصادم،سابق چئیرمین سینیٹ کا بھانجا فہد ملک جاں بحق
واضح رہے کہ 15 اگست کو وفاقی دارالحکومت اسلام آباد کے سیکٹر ایف ٹین تھری میں 2مسلح گروپوں کےدرمیان فائرنگ کا تبادلہ ہوا ہے جس میں سابق چیئرمین سینٹ میاں محمد سومرو کا بھانجا ملک فہد جاں بحق ہوگیا تھا.
