لاہور: قومی کرکٹ ٹیم کے آل راؤنڈر فہیم اشرف آسٹریلیا کے خلاف پانچ میچوں کی سیریز کے بقیہ تین میچز سے باہر ہوگئے۔
تفصیلات کے مطابق پاکستان کرکٹ بورڈ (پی سی بی) نے فہیم اشرف کو آسٹریلیا کے خلاف بقیہ تین ون ڈے میچز میں آرام کرانے کا فیصلہ کیا ہے، فیصلہ ورلڈ کپ سے قبل اہم کھلاڑیوں کو آرام دینے کے لیے کیا گیا ہے۔
آسٹریلیا کے خلاف سیریز سے باہر ہونے والے فہیم اشرف آج کا میچ کھیل کر وطن واپس لوٹ جائیں گے۔
پی سی بی کا کہنا ہے کہ فہیم اشرف کی جگہ کسی متبادل کھلاڑی کو متحدہ عرب امارات نہیں بھیجا جائے گا کیونکہ اس وقت پاکستان کے پاس پہلے ہی چار فاسٹ بولرمحمد عامر، محمد عباس، محمد حسنین، عثمان خان شنواری موجود ہیں۔
آل راؤنڈر فہیم اشرف نے آسٹریلیا کے خلاف دوسرے ون ڈے میچ میں 14 رنز بنائے تھے انہیں کولٹر نیل نے ہینڈز کومب کے ہاتھوں کیچ آؤٹ کرایا جبکہ بولنگ میں وہ کوئی وکٹ حاصل نہیں کرسکے تھے۔
Faheem Ashraf to be rested from remainder of #PAKvAUS ODI series
More Details ▶️https://t.co/33vkqRvLNi pic.twitter.com/BWDlvoZcCa— PCB Official (@TheRealPCB) March 24, 2019
پہلے ون ڈے میچ میں انہوں نے 28 رنز کی اننگز کھیلی تھی جبکہ فہیم اشرف نے ایک وکٹ عثمان خواجہ کی حاصل کی تھی۔
یاد رہے کہ پہلے ہی آرام کی غرض سے سرفراز احمد، حسن علی، شاداب خان، شاہین شاہ آفریدی کو آرام کی غرض سے آسٹریلیا کے خلاف سیریز کے لیے نہیں بھیجا گیا تھا۔
قومی کرکٹ ٹیم کے کپتان سرفراز احمد کی عدم موجودگی میں سینئر کھلاڑی شعیب ملک قومی ٹیم کی قیادت کررہے ہیں، آسٹریلیا نے پہلے ون ڈے میچ میں گرین شرٹس کو 8 وکٹوں سے شکست دی تھی۔
