ریاض: سعودی عرب کے فرمانروا شاہ سلمان بن عبدالعزیز نے شہزادہ فیصل بن فرحان بن عبداللہ کو سعودی عرب کا نیا وزیرخارجہ مقرر کردیا۔
تفصیلات کے مطابق خادم الحرمین الشریفین شاہ سلمان بن عبدالعزیز کی جانب سے سعودی کابینہ میں تبدیلیاں کی گئی ہیں۔ شاہی فرمان کے مطابق ابراہیم العساف سے ذمہ داریاں واپس لے لی گئی ہیں اور ان کی جگہ شہزادہ فیصل بن فرحان بن عبداللہ کو وزیرخارجہ مقرر کیا گیا ہے۔
شہزادہ فیصل نے کچھ ماہ جرمنی میں بطور سعودی سفیر کے فرائض انجام دیے اور اس سے قبل واشنگٹن کے سفارت خانے میں سیاسی مشیر کے عہدے پر فائز رہے۔
سعودی فرمانروا کے فرمان کے مطابق وزیر ٹرانسپورٹ نبیل بن محمد العامودی کی جگہ صالح بن ناصر بن علی الجاسر کو نیا وزیر ٹرانسپورٹ مقرر کیا گیا ہے۔
شاہی فرمان کے مطابق عصام بن عبداللہ بن خلف الوقیت کو قومی انفارمیشن سینٹر کا ڈائریکٹر کیا گیا اور ڈاکٹر طارق بن عبداللہ کو نیشنل ڈیٹا مینجمنٹ آفس کا سربراہ مقرر کیا گیا ہے۔
سابق وزیرخارجہ ابراہیم العساف کو گزشتہ سال دسمبر میں عادل الجبیر کی جگہ وزیرخارجہ تعینات کیا گیا تھا۔
سعودی کابینہ کا اجلاس، فلسطین کی حمایت جاری رکھنے کا عزم
یاد رہے کہ گزشتہ روز خادم الحرمین الشریفین شاہ سلمان کی زیرصدارت اجلاس میں ایک بار پھر اس عزم کا اظہار کیا تھا کہ مملکت فلسطینی ریاست کے قیام کے لیے ہونے والی کوششوں کی حمایت کے ساتھ مظلوم فلسطینی قوم کی اخلاقی، سیاسی اور سفارتی حمایت جاری رکھے گی۔
