اسلام آباد: وفاقی وزیر برائے آبی وسائل فیصل واوڈا کا کہنا ہے کہ نواز شریف نے دوسرے صوبے کے حق پر ڈاکہ ڈالا اور پانی چوری کیا۔ فنانشل چوری کے ساتھ پانی کی حصے داری بھی چوری کر رہے ہیں۔
تفصیلات کے مطابق وفاقی وزیر برائے آبی وسائل فیصل واوڈا نے قومی اسمبلی کے اجلاس میں اظہار خیال کرتے ہوئے کہا کہ سندھ کے پانی کے لیے کسی صوبے میں جا کر بات کرنا پڑی تو کروں گا۔
انہوں نے کہا کہ ٹیلی میٹرز کا ایشو ہے، پانی مینوئل طریقے سے ناپا جا رہا ہے۔ زبانی احکامات کے ذریعے ٹیلی میٹرز بند کیے گئے۔
فیصل واوڈا نے سندھ کے پانی کی چوری کا ذمہ دار نواز حکومت کو قرار دیتے ہوئے کہا کہ نواز شریف نے دوسرے صوبے کے حق پر ڈاکہ ڈالا اور پانی چوری کیا۔ فنانشل چوری کے ساتھ پانی کی حصے داری بھی چوری کر رہے ہیں۔
انہوں نے کہا کہ ایوان کو بتانا چاہتا ہوں گزشتہ دور میں کی گئی پانی چوری پکڑ چکا ہوں۔ ایشو پر سندھ حکومت کے ساتھ کندھے سے کندھا ملا کر چلوں گا۔ وزیر اعلیٰ سے ملاقات کر کے ایشو کو حل کروں گا۔
وفاقی وزیر نے کہا کہ 58 فیصد پانی کم پہنچ رہا ہے جس میں 44 فیصد چوری ہورہا ہے، باقی نقصانات ہیں۔
انہوں نے کہا کہ موجودہ حکومت میں انصاف کے تقاضے پورے کیے جائیں گے۔ اپوزیشن کو ساتھ لے کر چلیں گے، وفاق مدد کرے گا۔ مختلف پروجیکٹس کا غیر جانب دار آڈٹ بھی کروایا جائے گا۔
فیصل واوڈا کی تقریر کے جواب میں پاکستان پیپلز پارٹی کی رکن شازیہ مری نے کہا کہ کیا حکومت سندھ کو 1991 ایکٹ کے تحت پانی دلائے گی؟ پانی کی کمی سے ملک کا نقصان ہوگا۔ ارسا کی خاموشی سمجھ سے بالاتر ہے، حل کے لیے مل کر بیٹھنا ہوگا۔
فیصل واوڈا نے کہا کہ پانی کے مسئلے پر کوئی کمیٹی بنانے کی ضرورت نہیں۔ پانی کی چوری ہوئی ہے، چوری و ڈکیتی پر کوئی سمجھوتہ نہیں ہوگا۔ پانی کی چوری کا ریکارڈ ہمیں ورثے میں ملا ہے۔
