The news is by your side.

Advertisement

ن لیگ اور پیپلز پارٹی مہمند ڈیم کو متنازع بنا رہی ہیں: فیصل واوڈا

اسلام آباد: وفاقی وزیر برائے آبی وسائل فیصل واوڈا نے کہا ہے کہ شہباز شریف نے مہمند ڈیم پر جھوٹا بیانیہ ایوان میں پیش کیا.

ان خیالات کا اظہار وفاقی وزیر نے قومی اسمبلی میں تقریر کرتےہوئے کیا. اس دوران انھوں‌ نے اپوزیشن لیڈر شہباز شریف کی تقریر کو شدید تنقید کا نشانہ بنایا.

پاکستان کی بہتری کے لئے مہمند ڈیم کی تعمیر نہیں رکے گی، مہمند ڈیم کا افتتاح ہوگا، تعمیر ہوگا اور پھر مکمل بھی ہوگا،

فیصل واوڈا

فیصل واوڈا کا کہنا تھا کہ شہبازشریف نے  پارلیمنٹ میں جھوٹا بیانیہ دیا اور ایوان سے بھاگ گئے، جس بربریت سے ملک کو لوٹا گیا، اسی بربریت سے جھوٹا بیانیہ بنایا گیا، وفاقی وزیر نے کہا کہ اپوزیشن لیڈرنے جو پیپرا رولز بتائے، وہ جھوٹ پر مبنی ہیں، پیپرا رولز انگریزی میں سمجھ نہیں آتے تو اردو میں لاؤں گا.

فیصل واوڈا نے کہا کہ 54 سال سے مہمند ڈیم تاخیر کا شکار اور فائلوں کی حد تک تھا، مہمند ڈیم پر چیف جسٹس پاکستان کا نوٹس لینے پر شکریہ ادا کرتا ہوں.

انھوں نے کہا کہ جو اشتہار کے ذریعے ہوں، اُسے سنگل بڈنگ نہیں کہا جا سکتا، سنگل بڈنگ کے لئے وزیراعظم اور کابینہ کی منظوری لازمی ہوتی ہے، وزیراعظم اور کابینہ کسی رشتے دار کو کنٹریکٹ دینے کی مجاز نہیں.

فیصل واوڈا نے کہا کہ ہمارے مخالفین کو تکلیف ہے کہ مہمند ڈیم کیوں بنایاجارہا ہے، مہمند ڈیم کے معاملے پر عوام کو گمراہ کرنے کی کوشش کی گئی، انھوں‌نے پہلے بھی ملک میں ایسے کام کئے کہ انھیں منہ چھپانا پڑا.

پاکستان کی بہتری کے لئے مہمند ڈیم کی تعمیر نہیں رکے گی، مہمند ڈیم کا افتتاح ہوگا، تعمیر ہوگا اور پھر مکمل بھی ہوگا.

مزید پڑھیں: آئندہ نسلوں کو بچانے کے لیے ڈیم کے سوا کوئی راستہ نہیں، چیف جسٹس

فیصل واوڈا کے مطابق چیف جسٹس نے نوٹس لے کر پاکستان کی سالمیت کی بات کی، مہمند ڈیم کے معاملے پر 5 کمپنیوں نے بڈنگ کے عمل میں حصہ لیا، 2017 نومبر میں ٹینڈرزکو کال ان کیا گیا، جون 2018 میں دستاویز جمع ہوئے، جون 2018 میں پی ٹی آئی حکومت یا عمران خان وزیراعظم نہیں تھے، ٹینڈر کا فیصلہ حکومت نہیں بلکہ ملکی و غیرملکی فورمز کی رپورٹ پر کیا گیا.

فیصل واوڈا کا کہنا تھا کہ ن لیگ اور پیپلز پارٹی دونوں مہمند ڈیم کو متنازع بنا رہی ہیں، پاکستان کے مسئلے حل ہوگئے تو ان کی سیاست دفن ہوجائی گی.

ان کا کہنا تھا کہ فوج پر تنقید کرنے والوں نے آج آرمی چیف کی تعریف کی، جس کی خوشی ہوئی.

Comments

comments

یہ بھی پڑھیں